Olympian Marcial, delikado pa ang kategorya sa Asia

ni GA @Sports | August 17, 2023

Maaaring tapyasin ang kategorya ni 2020 Tokyo Olympics bronze medalist Eumir Felix Marcial sa 19th Asian Games sa Hangzhou, China, nang pamunuan ng Association of Boxing Alliances in the Philippines (ABAP) kasunod ng nananatiling obilgasyon nito sa professional boxing.

Nananatiling walang desisyon ang 27-anyos mula Lunzuran, Zamboanga City na tinatarget na isalang sa men’s under-80kgs category matapos ang naunang pahayag ni MP Promotions president at international matchmaker Sean Gibbons na maaaring matapat ang susunod na professional fight ni Marcial (4-0, 2KOs) sa Setyembre na siyang simula rin ng aksyon sa Asiad meet simula Setyembre 23 hanggang Oktubre 8.

“Wait and see pa din, no official announcement yet on his pro fight. If he’s available, he can join us in the Asian Games, if not, vacant ang 80kg,” wika ni ABAP secretary-general Marcus Jarwin Manalo na aminadong malaking kawalan si Marcial sa national squad, subalit mananatiling sasandal pa rin sa mga beteranong boksingero na pangungunahan nina Olympic silver medalists Nesthy Petecio at Carlo Paalam, gayundin si 3-time Southeast Asian Games titlist Ian Clark Bautista.

Nauna ng lumabas sa report na planong isalang ang undefeated Pinoy southpaw sa hindi pa matukoy na kalaban kasunod ng promotional contract umano nito na pinirmahan sa Premier Boxing Champions (PBC). Sinabi ni Gibbons na kinakailangan na nitong isantabi ang pangarap sa Olympiad dahil wala na umano itong dapat patunayan sa pagkakapanalo ng medalya noong 2021 Summer Games.

Limang boksingero pa lang ang nakasisiguro ng puwesto sa Asian quadrennial meet mula kina Marcial, Petecio, John Marvin, Aira Villegas at Olympian Irish Magno, habang paglalaban pa sa box-off ang weight category sa men’s 57kgs, 63.5 at 71kgs division.