Obiena at Knott, inihiwalay ng van at hotel para 'di mahawa

ni Gerard Arce - @Sports | July 31, 2021

Naging matindi ang pag-iingat na ginawa ng Philippine athletics delegation para sa 2020+1 Tokyo Olympics bilang paghahanda sa pagsabak ni EJ Obiena, ngayong araw, Sabado, dahil nagpositibo sa COVID-19 ang dalawang katunggaling pole vaulters na sina 2-time World champion at 2016 Rio Olympics bronze medalist Sam Kendricks ng U.S. at German Chiaraviglio ng Argentina.

Hindi ipinagwalang bahala ng grupo ng Philippine Athletics Track and Field Association (Patafa) sa pangunguna ni secretary-general Teddy Capistrano sa pagbabantay kina Obiena at sprinter Kristina Knott.

Masusing binabantayan ang bawat pagsasanay at iniiwas na maisama sa grupo ng iba pang pole vaulters sa iisang sasakyan. “We're taking a lot of extra precautions now,” wika ni Capistrano. “We're bringing our own alcohol to Edogawa Stadium, where EJ practices, and we are the ones who wipe down whatever surfaces he will be in contact with. We can never be too careful anymore.”

Gumawa ng hakbang si Capistrano na magkaroon ng sariling van sa team practice upang hindi hayaan si Obiena na sumakay sa ginagamit na bus o kahit anong Olympic-accredited na taxi.

Nauna ng napagdesisyunan ng grupo ni Knott na manatili sa Conrad Hotel kesa sa lumipat sa Athletes Village upang maisalba ang sarili sa pagkahawa. “We're lucky we decided to stay here,” saad ni Capistrano.

Magsisimula ang kampanya ngayon ng 25-anyos sa Olympic Stadium para sa qualifying round ng 8:40 ng umaga kasama sa Group A sina 2012 London Olympics champion Renaud Lavillenie ng France, Masaki Ejima ng Japan, Claudio Michel Stecchie ng Italy, Pawel Wojciechiwski ng Poland, Sondre Guttormsen ng Norway, Robert Sobera ng Poland, Valentin Lavellenie ng France, Torben Blech ng Germany, Oleg Zernikel ng Germany, Emmanuil Karalis ng Greece, Kurtis Marschall ng Australia at KC Lightfoot ng US.