Obiena, 4th place sa ISTAF Indoor; Duplantis, Gold

ni Gerard Arce - @Sports | February 06, 2022

Lumapag sa 4th place si Olympian pole vaulter Ernest John Obiena sa kauna-unahang kompetisyon nito ngayong taong 2022 sa ISTAF Indoor sa Berlin, Germany na pinangunahan ni Tokyo Olympics gold medalist Armand Duplantis ng Sweden kahapon ng umaga.

Nakumpleto ng 26-anyos na 2019 SEA Games champion ang 5.70-meters para tumapos sa likod nina hometown bet Oleg Zernikel na may 5.81-meters para sa bronze medal at American KC Lightfoot na may 5.92 na nakakuha ng runner-up finish. Walang kahirap-hirap sa World No.1 at record holder na 22-anyos na si Duplantis na mairehistro ang 6.03 meters para sa titulo.

Sa naturang kumpetisyon rin naghari si Obiena noong 2021 para magtala ng national record na 5.80 meters.

Nakatakda ring lahukan ng 2019 Universiade champion ang International Pole Vault Invitational sa Uppsala, Sweden, sa Pebrero 9; Orlen Cup sa Lodz, Poland sa Pebrero 11; Meeting Hauts-De-France sa Lievin, France sa Pebrero 17 at Orlen Copernicus Cup sa Torun, Poland sa Pebrero 22.

Sinabi nito sa kanyang socmed account na bahagya lang naantala ang kanyang pagdating sa lugar dahil sa ilang mga hindi maiiwasang pangyayari.

Naging matagumpay ang taong 2021 para kay Obiena nang iukit ang bagong PHL best at Asian record sa 2021 Golden Roof Challenge sa Innsbruck, Austria. Nakamit nito ang 5.93-meters, sapat upang sirain ang dating marka na hinawakan ni 2-time Olympian at 1997 Paris World Indoor titlist Igor Potapovich ng Kazakhstan ang marka na 5.92 na kanyang itinala noong Hunyo 13, 1992 sa Dijon, France.