NU Bulldogs lumakas ang tsansa sa 2x-to-beat Final 4

by Gerard Arce @Sports News | November 9, 2026

Photo: Matikas na bumanat ng pagsalaksak ng bola si Mo Diassana ng National University kontra sa mahigpit na depensa ng katunggaling si Seven Gagate ng De La Salle University sa UAAP Season 89 Men's Basketball game sa Araneta Coliseum. (Reymundo Nillama)

Mga laro sa Miyerkules(Smart Araneta Coliseum)

2:30 p.m. – UST vs UE (Men)

5 p.m. – AdU vs Ateneo (Men)

Inako ng beteranong guwardiya na si Reinhard Jumamoy ang responsibilidad sa 4th quarter kasunod ng mainit na shooting upang iahon ang NU  Bulldogs kontra sa defending champions DLSU Green Archers sa 84-80 upang tumibay pagkakakapit sa second spot sa pambungad na laro sa UAAP Season 89 men's basketball tournament kahapon sa Smart Araneta Coliseum.

Tumikada ang 22-anyos mula Cebu City ng game-high 21 puntos para sa solidong 8-3 kartada ang NU Bulldogs at palakasin ang tsansang makuha ang isa sa twice-to-beat bentahe sa final 4 sa nalalabing tatlong laro sa 2nd round ng eliminasyon.

“Congratulations kay Reinhard kasi he’s been off through the past games, medyo natamaan din siya sa shoulder before, so at least hats off sa kanya kung papaano niya dinala ‘yung team, hindi sila bumigay nung dulo kahit nagkamomentum ‘yung La Salle,” pahayag ni NU head coach Jeff Napa.

Hindi nagpatinag ang DLSU mula kina Earl Abadam, Doy Dungo at nagbabalik na si Jacob Cortez para ilunsad ang 10-2 run upang mabawi ang bentahe sa 79-80 sa last 2 minutes.  Sumaklolo sa iskoring para sa NU si Mo Diassana sa 19 pts.  Bumida naman para sa La Salle si Dungo sa 19 pts.