No show sa imbestigasyon ng PNP-CIDG... Coach Baldwin, nag-resign na

ni Jeff Tumbado @News | June 16, 2026

Photo: Tab Baldwin - Ateneo de Manila University

Sabay na nagbitiw sina Coach Tab Baldwin at Team Manager Christopher "Epok" Quimpo sa Ateneo de Manila University men’s basketball team kasunod ng imbestigasyon sa pagkamatay ng kanilang dalawang manlalaro na sina Rene Baterbonia at Divine Adili.

Inanunsyo ni Fr. Bobby Yap, pangulo ng Ateneo de Manila University, ang pagbibitiw ng dalawa sa isang press conference na ginanap sa loob ng kampus ng unibersidad nitong Lunes.

Bago ang kanilang pagbibitiw, opisyal nang inilagay sina Baldwin at Quimpo sa “on leave” status matapos ang trahedyang naganap sa bayan ng Dipaculao, Aurora noong Hunyo 8, kung saan nalunod at nasawi sina Baterbonia at Adili.

Kabilang sina Baldwin at Quimpo sa mga ipinatawag ng Philippine National Police-Criminal Investigation and Detection Group (PNP-CIDG) sa Camp Crame nitong Lunes bilang bahagi ng patuloy na imbestigasyon.

Gayunman, hindi dumalo ang dalawa at ang kanilang mga abogado lamang ang humarap sa mga otoridad.

Ang pagbibitiw ni Baldwin ay nagtatapos sa kanyang sampung taong panunungkulan bilang head coach ng Ateneo Blue Eagles.