“No permit, No exam”, bawal na

@Editorial | Marso 17, 2024

Magandang balita ang pagpirma sa Republic Act No. 11984 na pumapayag sa mga estudyante na kumuha ng pagsusulit kahit hindi pa nababayaran ang kanilang obligasyong pinansyal.

Sa ilalim ng nasabing batas, ang mga disadvantage student na hindi pa nakakabayad ng matrikula at iba pang bayarin ay papayagan pa ring mag-exam.

Sa “Anti-No Permit, No Exam Act”, lahat ng private at public education institution ay obligadong tanggapin at payagan ang mga estudyanteng may kakulangan sa pinansyal na kumuha ng nakatakdang periodic at final examination.

Saklaw nito ang basic education institutions (K to 12), higher education institutions, at technical-vocational institutions.

Masasabing bawas-pasanin ang inaprubahang batas partikular sa mga magulang na nahihirapang tustusan ang pag-aaral ng anak. Sa pamamagitan nito, kahit paano ay maramdaman na ang edukasyon ay para sa lahat.

Ngayong ganap na itong batas, umaasa tayo na wala nang estudyante na mag-aalala na baka hindi makapag-exam dahil may utang sa iskul o matakot na hindi na makapagtapos ng pag-aaral.

Samantala, nakasaad sa batas na ang lokal na social welfare development officer ng munisipalidad, lungsod, probinsya o regional office ng Department of Social Welfare and Development (DSWD) ang mag-iisyu ng kinakailangang certificate sa mga estudyanteng walang kakayahang magbayad dahil sa kalamidad, kagipitan, at iba pang makatuwirang dahilan.

Kaugnay nito, ang mga educational institution naman na hindi susunod sa batas ay maaaring maharap sa administrative sanction na ipapataw ng Department of Education (DepEd), Commission on Higher Education (CHED) o ng Technical Education and Skills Development Authority (TESDA).

Umaasa tayo na masisiguro na ang edukasyon ng mga kabataan at ang kanilang magandang kinabukasan.