Nietes, Casimero at Mama babanat sa Disyembre sa UAE

ni Gerard Arce - @Sports | November 17, 2021

Tatlong Pinoy boxers ang babanat sa magkakahiwalay na laban sa pangunguna ni WBO bantamweight champion “Quadro Alas” John Riel Casimero na idedepensa ang titulo kontra kay British Paul “Baby-Faced Assassin” Butler, habang susubok na maagaw ni No.1 challenger Jayson “Smasher” Mama ang titulong IBF flyweight kay Sunny “Showtime” Edwards, at magbabalik aksyon si dating 4-division World champ Donnie “Ahas” Nietes sa Disyembre 11 sa Coca-Cola Arena sa Dubai, UAE.

Kagagaling lang sa kanyang title defense ng three-division World champion kontra kay 2-time Olympic gold medalist Guillermo Rigondeaux ng Cuba noong Agosto 14 sa California.

Susubukan namang pitasin ng Filipino undefeated na si Mama ang titulo ni Edwards ng Inglatera na minsang naunsyami noon dapat Setyembre 11 sa London dahil sa natamong injury ng English boxer.

Sumabak muna sa isang 10-round flyweight fight ang Sanman boxer kay Romshane Sarguilla ng Valenzuela City na nagtapos sa 8-round stoppage sa General Santos noong Abril 30. “We are delighted to finally announce plans for this incredible event in Dubai next month. We made it clear from the offset that we have massive plans in store for Probellum, and this world title double-header shows just that,” wika ni Richard Schaefer, Presidente ng Probellum.

Muli namang sasabak ang 38-anyos mula Murcia, Negros Occidental si Nietes laban kay Norbelto Jimenez ng Dominican Republic matapos mapagwagian ang (WBO) super flyweight title laban kay Pablo Carillo ng Columbia sa Dubai noong Abril 3 para sa 10-round unanimous decision.