Negative sa drug test... Respicio, 'di nagsa-shabu, natural ang sayad — Remulla

by Jeff Tumbado @News | October 8, 2026

Photo: Kopya ng drug test ni Vice Mayor Respicio bilang tugon sa hamon sa kanya ni DILG Secretary Jonvic Remulla. (Mai Ancheta)

Nagbigay ng reaksyon si Interior Secretary Jonvic Remulla sa negatibong resulta ng drug test ni Reina Mercedes, Isabela Vice Mayor Harold Respicio.

Sa mensahe sa media, binati ni Remulla si Respicio. Pero iginiit niya na ngayong napatunayang hindi ito gumagamit ng ilegal na droga, lumalabas aniya na natural lang pala ang asal nito.

“Congratulations. Now that it’s confirmed he’s not on shabu, totoo na talaga na natural ang sayad ng utak niya,” aniya.

Sumailalim agad sa drug test si Respicio, matapos ihayag ni Remulla na nais niyang ipasailalim sa drug testing ang opisyal kasunod ng naging mainitang sagutan at sigawan sa pagitan ng ilang kapitan ng barangay sa isang sesyon ng Sangguniang Bayan.

Sa isang social media post ni Respicio, pinare-reimburse nito kay Remulla ang ibinayad sa drug testing na nagkakahalaga ng P28,000 sa St. Luke's Hospital. Tumugon naman ang kalihim na handa niyang bayaran ang ginastos nito.