NBI, ginisa ni Sen. Imee... Affidavit at subpoena kay VP Sara, mali-mali

ni Mylene Alfonso @News | July 14, 2026

Photo: Senate of the Philippines

Aminado ang National Bureau of Investigation (NBI) na may mga pagkakamali sa pagta-type sa subpoena at affidavit of investigation na inilabas kaugnay sa umano’y mga pagbabanta ni Vice President Sara Duterte kay Pangulong Ferdinand Marcos Jr.

Inamin ni Atty. Jeremy Lotoc, NBI regional director sa Bangsamoro Autonomous Region in Muslim Mindanao (BARMM), na parehong maling nalagyan ng petsang Nobyembre 6, 2024 ang subpoena at affidavit of investigation.

Dating nagsilbi si Lotoc bilang chief ng NBI Cybercrime Division, na nagsagawa ng imbestigasyon sa ginanap na online press conference ni Duterte noong hatinggabi ng Nobyembre 2024; sa nasabing okasyon, sinasabing sinabi niyang kumuha siya ng isang upahang mamamatay-tao upang paslangin ang Pangulo, ang First Lady, at si Romualdez sakaling siya mismo ay paslangin.

Nilinaw niya na ang affidavit of investigation ay dapat na may petsang Disyembre 11, 2024.

Kinuwestiyon naman ni Senator-judge Imee Marcos ang timeline ng imbestigasyon ng NBI kung saan tinanong niya kung bakit naglabas umano ang ahensya ng subpoena sa ABS-CBN noong Nobyembre 6, 2024 upang humingi ng kopya ng late-night online press conference ni Duterte, gayung inatasan lamang ang NBI na imbestigahan ang insidente noong Nobyembre 23, 2024.

"I believe that's a typo, 'yung date. Kasi makikita doon 'yung date ng appearance ng taga-ABS-CBN, which is consistent sa ibang taga-media," sabi ni Lotoc.

Binigyang-diin din ni Marcos na ang naturang petsa ay lumitaw sa affidavit of investigation na nilagdaan ni Lotoc.

"Dalawang typo, carried over? Ikaw ang pumirma, eh. 'Yung affidavit of investigation mo na binigay pati amended, carried over din. 'Yung first draft na ni-reject ng DOJ, 'yung ikalawa, parehong November 6," pahayag ni Marcos.