NBI Dir. Matibag, witness... Misis, endorser ng impeachment ni VP Sara

ni Mylene Alfonso @News | July 22, 2026

Photo: Senate of the Philippines

Kinumpirma ni National Bureau of Investigation (NBI) Director Melvin Matibag na kabilang ang kanyang asawa sa mga nag-endorso ng impeachment complaint laban kay Vice President Sara Duterte. 

Ito ay makaraang kuwestiyunin ni Defense counsel Atty. Mark Vinluan na ang asawa ni Matibag na si Rep. Ma. Rene Ann ang isa sa mga nag-endorso ng House Resolution 989 na naglalaman ng articles of impeachment laban kay Duterte.

Ayon kay Matibag, hiwalay at walang kaugnayan ang papel ng kanyang asawa bilang mambabatas sa kanyang tungkulin bilang direktor ng NBI.

Binigyang-diin din niya na ang trabaho ng kanyang asawa ay “totally detached” mula sa kanyang tungkulin bilang direktor ng NBI.

Humarap sa Senado si Matibag bilang huling testigo ng prosekusyon para sa Article IV ng Articles of Impeachment.

Tinalakay sa kanyang pagharap ang umano’y “grave threats” na iniuugnay kay Vice President Sara Duterte laban kina Pangulong Ferdinand Marcos Jr., First Lady Liza Araneta-Marcos, at dating House Speaker Martin Romualdez.