Naunahan na… MOVIE NI HILDA, TAGILID MAPASAMA SA MMFF 2025 DAHIL KINA VICE AT NADINE

ni Julie Bonifacio @Winner | July 26, 2025

Photo: HildaG Koronel - IG

Looking forward na ang mga taga-showbiz sa susunod na apat na pelikulang papasok sa Metro Manila Film Festival (MMFF) this coming December.

Isa sa mga inaabangan namin na isali sa MMFF 2025 ay ang comeback movie ng award-winning actress na si Hilda Koronel, ang historical thriller na Sisa sa direksiyon ni Jun Robles Lana under The IdeaFirst Company nina Direk Jun at Direk Perci Intalan.

Pero kahit pala ipasok ng The IdeaFirst Company ang Sisa sa MMFF, mahihirapan sila dahil sa rules and regulations ng festival.

Nauna na kasi sa Magic Four ang movie ni Direk Jun na pinagbibidahan nina Vice Ganda at Nadine Lustre, ang Call Me Mother (CMM).

May ruling daw kasi sa mga papasok sa Magic 8 sa MMFF, kailangan ay isang movie lang ng direktor ang allowed na makapasok.

Although, nu’ng ini-research namin sa Google kung may ganitong rule sa MMFF, it turned out na wala naman.

“The MMFF (Metro Manila Film Festival) does not have a specific rule stating one director can only have one movie in the festival each year. “However, the MMFF has had rules and controversies regarding film submissions and screening that have impacted multiple directors and films,” sabi sa Google.

Walang explicit ‘one-film-per-director’ rule sa MMFF. Pero siyempre, nasa decision na ‘yan nina Direk Jun at Direk Perci. Baka may kailangan din silang isaalang-alang na factors on having two movie entries sa MMFF.

Sa true lang, isang movie lang na isali sa MMFF, sobrang hirap na — dalawa pa kaya, lalo na’t hindi naman ganoon kalaki ang production nina Direk Jun at Direk Perci compared sa ibang film studios gaya ng Star Cinema, Viva Films, at Regal Films.

Sa promo pa lang, ngaragan na ‘yan, ‘di ba? Saka, mas maganda na rin na unahin munang iikot sa international film festivals ang Sisa, na ‘yun naman ang original plan ng The IdeaFirst Company.

---

NAKAKABAHALA ang news sa online na nabasa namin tungkol sa isang Pinoy na concert producer sa Amerika na nagngangalang Vince Gesmundo.

Ayon sa news, inutusan ng Queens County Civil Court ang concert producer na bayaran ang kanyang inutangan ng pera na hindi bababa sa halagang $23,000.

Batay sa dokumento, si Vicente Gesmundo, na ang kilalang address ay nasa 52nd Street sa Woodside, Queens ay may utang kay Milagros dela Cruz Llamas ng Maspeth, Queens ng $23,342.61. Kasama ang $350 sa ibang mga bayarin na umabot sa $23,692.61 na hatol ng korte.

Pinautang daw ni Milagros si Vince ng halagang $17,500 sometime around 2020 to 2021 during the pandemic.

Ang halagang ito ay hiniram para makatulong kay Vince na i-finance ang concert na ipinrodyus niya para kay Jessica Sanchez sa Hard Rock Boston.

Hindi ito nabayaran ni Vince hanggang sa lumobo na ang amount to $23,342.61 due to the accrued interest of $5,842.61.

Sabi pa raw ni Milagros, may iba pa raw nahiraman ng pera si Vince bukod sa kanya. Ilan sa kanila ay nakilala ni Milagros at nakuha ang pangalan ng mga pinaghihinalaang nagpapautang.

Ang isa raw sa kanila ay isang doktora sa Manhattan na humiling na itago ang kanyang pangalan. Nanghiram daw si Gesmundo sa doktor ng $5,000 hanggang $6,000 ilang taon na ang nakararaan.

Pahayag ng doktora na tumangging magbigay ng pangalan, “Yes, he owes me money but it was several years ago. I don’t think I have the time to look back for all that evidence. As much as I would love to get my money back, it’s not as much as the other victims.”

Sabi pa ng doktora, siya raw ang pinagbayad ni Vince sa airfare ng grupo ng Aegis papuntang Florida. Nangako raw si Vince sa kanya na ibabalik ang perang ipinambili niya ng tiket. Bukod sa airfare, pinagbayad din daw si doktora sa nirentahang big SUV at walang kamalay-malay na siya rin ang susundo sa Aegis team sa airport.

Pagkatapos ay gusto pa siyang hiraman ng another $20,000 ni Vince, pero pinayuhan na siya ng mga kaibigan na hindi na siya mababayaran nito.

“Since then I blocked him on Facebook (FB) and on the phone,” ani doktora.

May isang babae pa na nautangan din daw ni Vince ng $10,000 na buong kagalakan naman niyang ibinigay dahil may common friend sila na pinagkakatiwalaan niya.

Nu’ng malaman ng babae na marami pang iba ang pinagkakautangan ni Vince, hindi na siya nagpursige na singilin ang concert producer. She just gave up getting her money back and she did not sue him. Naawa raw siya kay Vince at the same time, sa mga biktima nito.

Meron pang nurse na nakunan din daw ni Vince ng pera amounting to $10,000. Fan daw siya ng AlDub (Alden Richards and Maine Mendoza) kaya excited siya na tulungan si Vince sa pag-produce nito ng show para kay Allan K.

Si Cheryl Versales naman, may-ari ng group home facilities sa Florida ay sinabi na may utang din si Vince sa kanya na $7,000 na ginamit daw sa show ni Katrina

Velarde.

Meron din daw isang community leader from New York na nagsabing si Gesmundo ay may utang sa kanya na aabot mula $35,000 hanggang $45,000.

Sumulat na rin daw si Milagros sa Knights of Rizal New York, kung saan si Gesmundo ay may hawak na posisyon bilang auditor. Ipinapa-revoke ni Milagros ang membership ni Vince at pinapatanggal ito bilang auditor ng asosasyon upang mapanatili ang integridad at dangal ng KOR.

Kinumpirma ng KOR New York Chapter Commander na si Rely Manacay na natanggap niya ang liham.