Nambu-bully sa utol, binugbog sa party... Babaeng Grade 12, sa kulungan nag-birthday

by Mai Ancheta @News | October 25, 2026

Photo: Ang Grade 12 ay nahaharap sa kasong physical injuries matapos saktan ang 18-anyos na nam-bully umano sa kanyang 25-anyos na PWD na kapatid.

Sa kulungan, inabutan ng birthday ang isang 20-anyos na babae matapos arestuhin dahil sa pananakit sa Brgy. Lahug, Cebu City.

Ang suspek na Grade 12 ay nahaharap sa kasong physical injuries matapos saktan ang 18-anyos na nam-bully umano sa kanyang 25-anyos na PWD na kapatid.

Ayon sa suspek na si "Mandy," nagalit siya sa biktimang si "Rowena" dahil madalas umano nitong laitin ang kanyang kapatid na walang mga kamay.

Nagkaroon umano ng kasayahan sa bahay ng suspek at kasama sa inimbitahan si Rowena.

Habang nagkakaroon ng kasayahan ay nagsumbong sa suspek ang ate niya na umiiyak dahil binully umano siya ni Rowena, kaya nagalit ito at sinuntok, sinakal at sinabunutan ang kaibigan.

Agad namang dumating ang mga barangay tanod at dinala si Mandy sa istasyon ng pulisya.