Naka-Quarantine si P-Digong, ingat Senior Citizen pa naman!

ni Ka Ambo - @Bistado | February 04, 2022

SUMUGOD na ang 3,000 US troops sa Ukraine.

Reserbang puwersa ito kontra Russia!

◘◘◘

WALA nang atrasan ‘yan.

Tiyak na magpapalakas din ng puwersa ang Russia kontra US at NATO!

◘◘◘

SA kaunting pagkakamali, maaaring biglang magkagulo sa Europe.

Ang lockdown ay puwedeng mapalitan ng Martial Law!

◘◘◘

MULING nag-aalboroto ang Bulkang Taal.

Bago mag-pandemic, sumabog ang Taal.

Ngayon, naglalaho ang COVID-19, nagpaparadamdam din ang bulkan!

◘◘◘

HINDI nauubusan ng krisis ang ‘Pinas.

Maaaring maglaho ang COVID-19, pero ang krisis sa ekonomiya ay hindi maglalaho na parang bula!

◘◘◘

DAPAT paghandaan ng gobyerno ang anumang krisis, kalamidad o digmaan.

‘Yan ay nananatiling banta sa ating buhay!

◘◘◘

BAKIT hindi iniimbestigahan ng Senado at Kamara ang mga nawawalang sabungero?

Dedma rin ang PNP.

Takot ba sila sa mga suspek?

◘◘◘

MAGING ang media ay walang kongretong pagsasaliksik kaugnay ng mga nawawalang sabungero.

Fake news ba ‘yan o totoo?

◘◘◘

KAAWA-AWA naman ang mga kaanak ng nawawalang tao.

Hindi naglalabas ng anumang pahayag ang PNP, PAGCOR, GAB at Palasyo.

Eh, bakit?

◘◘◘

ISINAILALIM sa quarantine si P-Digong.

Na-expose siya sa nagpositibo sa COVID-19!

◘◘◘

PERO, senior citizen si P-Digong.

Dapat ingatan niya ang kanyang kalusugan.

Hindi nakatitiyak ang sinumang sa naturalesa ng Omicron virus!

◘◘◘

MARAMI ang tinamaan ng COVID-19, pero nakaligtas naman.

Pero, marami rin ang natuluyan!

◘◘◘

MABILIS na bumaba ang bilang ng mga tinatamaan ng COVID-19.

May pakiramdam tayo na ang kalahati ng datos — ay hindi totoo!

◘◘◘

KORUPSIYON ang dahilan kung bakit dinadaya ang datos sa COVID-19.

May malaking badyet kasi kaugnay ng COVID-19.

Gets?

◘◘◘

MALAKI na ang chance na makatikim ng face-to-face classes ang mga estudyante bago matapos ang school year.

Makakatikim ng graduation march ang inyong mga anak!

◘◘◘

DALAWANG taong hindi nagkikita ang mga titser at estudyante.

Paniwalaan-dili ito, pero totoo!

◘◘◘

MARAMING eskuwelahan ang nalugi at nagsarado.

Pero marami rin ang nagkamal ng salapi.

Hindi bumaba ang tuition — kahit hindi nagamit ang pasilidad ng eskuwelahan.

Kahit sarado ang gusali, naniningil ng miscellaneous at laboratory expenses.

Tsk-tsk-tsk!