Nag-post ng bagong piktyur… KRIS, TUMABA NA, PERO HIRAP PA RIN DAW BUMANGON SA BED

ni Julie Bonifacio @Winner | June 6, 2026

Photo: IG _krisaquino

Gusto na raw sumuko ni Kris Aquino, pero dahil sa mga anak niya ay patuloy siyang lumalaban. Ito ang naging emote niya sa muli niyang paglabas sa Instagram (IG).

Ibinahagi ni Kris ang matinding sakit na nararamdaman niya sa katawan dahil sa kanyang Rheumatoid Arthritis, kasabay ng pagbati sa 31st birthday ng kanyang panganay na si Joshua.

Ayon kay Kris, “The day-to-day pain in my joints caused by Rheumatoid Arthritis would be so unbearable except for the fact that when my legs give up and I’m about to take a tumble, you and Bimb have developed this 6th sense and are there to catch me.”

Ibinahagi rin niya ang mga larawan ng simpleng selebrasyon sa kanilang bahay.

Kasama sa okasyon ang mga kapatid ni Kris na sina Viel Dee at Ballsy Cruz, pati ang ilan sa kanilang mga anak, at ilang malalapit na kaibigan at taong nasa inner circle ng pamilya.

Caption ni Kris: “Happy Birthday, Kuya Josh! Had I not been yours and Bimb’s mama, I wouldn’t have the courage and the purpose to continue with my treatments.”

Nagpasalamat din siya sa anak sa patuloy na pag-alalay sa kanya sa araw-araw, lalo na sa tuwing nahihirapan siyang bumangon mula sa higaan.

“Thank you, Kuya, for your encouragement to get me out of bed as you lead me outside to the living room to watch our favorite shows. You’re the only one who has the power to get me moving. My wish is to one day be able to join you for your daily 7,000 to 10,000 steps. You are my inspiration. I love you very much,” ani Kris.

Samantala, napansin ng marami ang pag-improve ng hitsura ni Kris sa kanyang mga recent post.

Sey ng mga netizens:

“You look really good, Ms. Kris!”

“It’s nice seeing you with makeup, Miss Kris! I miss your glamorous self. BTW (by the way), I had your complete makeup line with Ever Bilena back in the day.”

“Wow! Big improvement kay Ma’am Kris. Dati, sobra ang payat n’ya.”

True.

---

DALAWANG hit series ng ABS-CBN ang napapanood na sa mahigit 200 bansa at teritoryo kabilang ang America, Europe, Oceania, Middle East, at Southeast Asia sa ilalim ng bagong partnership nito sa Rakuten Viki.

Mas lumawak pa ang abot ng mga Kapamilya series dahil sa Viki na may higit 120 milyong users sa buong mundo. Mas mapapalapit din sa international fans ang ABS-CBN shows sa tulong ng entertainment platform na Soompi.

Kabilang sa line-up ang Pinoy adaptation ng It’s Okay to Not Be Okay (IOTNBO) na pinagbibidahan nina Anne Curtis, Joshua Garcia at Carlo Aquino na nag-premiere noong April 17 sa ilang international territories.

Kasama rin ang He’s Into Her Season 1 (HIHS1) na napapanood na simula nu’ng May 8, at Season 2 na nag-stream na kahapon, June 5, na pinagbibidahan nina Belle Mariano at Donny Pangilinan.

Ang mga nasabing serye ay may English, Spanish, Portuguese, at French subtitles. 

Sa tulong ng community subtitles ng Viki, mas marami pang international viewers ang puwedeng maabot nito dahil sa collaborative translation system nito.

Ang naturang deal ay isinagawa sa pamamagitan ng ABS-CBN International Sales Division at bahagi ng patuloy na global expansion ng kumpanya.

Sa mahigit 50,000 oras ng content na naibenta sa mahigit 50 bansa sa buong mundo, patuloy na pinapalawak ng ABS-CBN ang abot ng Pinoy storytelling sa international audience.