Murang bigas, nagdulot ng stampede sa Nigeria

ni Eli San Miguel - Trainee @News | February 28, 2024

Abuja, Nigeria — Itinigil ng Nigeria Customs Service ang pagbebenta ng bigas sa mas murang halaga dahil nagdulot ito ng stampede sa opisina sa Lagos noong Biyernes.

“Unforeseen challenges arose when we ran out of stock and announced the continuation of the exercise the following day, leading to a regrettable outcome,” pahayag ni Nigeria Customs Service Abdullahi Maiwada.

“The crowd became desperate and charged through our barricades in search of rice bags inside emptied containers. In the stampede that ensued, some fatalities and injuries were regrettably recorded,” dagdag niya.

Libu-libong tao ang dumagsa sa opisina ng customs sa Lagos para kunin ang isang sako ng 25-kilogram (55-pound) na bigas na ibinebenta sa mas mababang presyo na 10,000 naira ($6.80) habang patuloy na tumataas ang presyo ng pagkain sa bansang may pinakamalaking populasyon sa Africa.

Tumaas ang presyo ng bigas sa Nigeria sa nakaraang mga buwan at nagkakahalaga na ngayon ng higit sa N70,000 naira ($47.60) bawat 50-kilogram na sako, kumpara sa dating presyo na nasa 45,000 hanggang 50,000 naira.

Nakikipaglaban ang Nigeria sa isa sa pinakamalalang krisis sa 'cost-of-living' na nakitaan ng pagtaas ng inflation na halos umabot sa 30%.

Bumagsak din ang halaga ng pera ng bansa kumpara sa dolyar ng United States, na lalong nagpapahirap sa ekonomiya kung saan marami ang umaasa sa mga importasyon.