Motor, sumampa sa center island, tumilapon... Lady rider at angkas, nagulungan ng MPV, dedo

by Janice Baricuatro @News | September 19, 2026

Photo: File

Patay ang isang babae at kanyang angkas matapos sumampa sa center island ang kanilang motorsiklo at tumilapon sa kabilang lane bago nagulungan ng Multi-Purpose Vehicle (MPV), kamakalawa ng gabi sa Daanghari Road, Brgy. Molino 4, Bacoor City, Cavite.

Kinilala ang mga biktima na sina alyas Myra, 49, safety officer, at ang kanyang backrider na si Paul, 42, kapwa residente ng Muntinlupa City.

Ayon sa pulisya, alas-10 ng gabi nang mawalan ng kontrol ang motor at sumampa sa center island. Tumilapon ang dalawa sa kabilang lane at doon nasalpok at nagulungan ng MPV na minamaneho ni alyas KC-Lyn, 30, engineer, ng Dasmariñas.

Tinangka pang umiwas ng driver ngunit nasagi naman nito ang isang motor na minamaneho ni alyas Simon, 25, na sakay si alyas Laine, 22. Kapwa nagtamo ng sugat ang dalawa at patuloy na inoobserbahan sa pagamutan. 

Hawak na ng pulisya si KC-Lyn at nahaharap sa kaukulang kaso.