More job fair, bawas-tambay

@Editorial | June 09, 2023

Tuwing may isinasagawang job fair, dagsa ang mga aplikante. Ibig sabihin, marami pa rin ang walang trabaho o umaasang magkaroon ng mas magandang oportunidad.

Sa Hunyo 12, kasabay ng pagdiriwang ng ika-125 Araw ng Kalayaan, inaasahang nasa 70,000 trabaho ang iaalok sa mga job seekers.

Ayon sa Department of Labor and Employment (DOLE), ang job at business fair ay gaganapin sa 48 sites ng bansa.

May kabuuang 68,455 job vacancies ang io-offer ng 840 employers, na mula sa top industries sa business process outsourcing, manufacturing, retail and sales, construction, financial at insurance sectors.

Ang trabaho na puwedeng aplayan ay customer service representative, production worker, sales clerk, cashier, laborer, lineman, financial consultant at microfinance officer.

Sa totoo lang, marami sa mga Pinoy ang matiyaga pagdating sa paghahanap ng trabaho, sadyang mailap lang ang oportunidad para sa iba.

Kaya naman, hangad natin na magpatuloy o kung puwedeng gawing regular ang pagsasagawa ng mga job fair para sa mga Pilipinong hirap sa buhay para mabigyan ng pagkakataon na magkaroon ng trabaho.