Mga walang modo at reckless driver, parusahan dapat!

ni Ryan Sison @Boses | July 14, 2025

Tila may ilan sa ating mga motorista ang mas inuuna pa ang paggawa ng content kaysa isipin ang kaligtasan nila at ng iba.

Nakakabahala na dahil sa paghabol ng views at likes, tila naisantabi na ang pagrespeto sa batas-trapiko at disiplina sa kalsada. Isa na namang patunay nito ang insidente ng vlogger/content creator na nag-viral matapos magmaneho na nakataas ang isang binti o leg — isang kilos na hindi lang delikado kundi malinaw na walang pakialam o iresponsable ang naturang driver. 

Kaya marahil umaksyon ang Land Transportation Office (LTO) at sinuspinde ng 90 araw ang kanyang lisensya bilang preventive measure at sa ginawang violation nito.  

Ayon sa Department of Transportation (DOTr), maliwanag na nilabag ng vlogger ang mga pamantayan ng maingat at ligtas na pagmamaneho, lalo’t ang ipinakita niyang asal ay isang masamang ehemplo sa publiko — partikular na sa mga kabataang babad sa social media. 

Base sa show cause order ng LTO, nakita sa video ang vlogger na nakaupong naka-lounging posture habang nagmamaneho, at nakataas ang isang leg sa driver’s seat, kung saan indikasyon ito na nakahiwalay sa tamang posisyon sa pagmamaneho. 

Sa ilalim ng SCO, inutusan ang vlogger na magpaliwanag kung bakit hindi siya dapat kasuhan ng reckless driving o tuluyang bawiin ang kanyang lisensya. Ang kanyang sasakyan ay isinailalim din sa alarm status, na nagbabawal sa anumang transaksyon habang iniimbestigahan. 

Matatandaang sinabi ni DOTr Secretary Vince Dizon na ipinag-utos ni Pangulong Ferdinand Marcos, Jr. na gawing ligtas at maayos ang ating mga kalsada. 

Hindi puwedeng palampasin ang ganitong asal, lalo na kung ang kasiyahan ng isa ay posibleng maging kapahamakan ng marami. Hindi entertainment ang mga pangunahing lansangan. Hindi ito stage para sa social media content. Bawat driver ay may pananagutang tiyakin ang kaligtasan hindi lang ng kanyang sarili kundi pati rin ng iba, lalo na ang mga walang kalaban-labang pedestrian at commuter.

Marahil, sa mga katulad ng nangyaring insidente, hindi lang ang lisensya ang dapat pinagsususpinde, kailangan ding ituro ang tunay na diwa ng responsableng pagmamaneho, respeto at disiplina sa kalsada, at malasakit sa kapwa.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com