Mga pasaway sa kalsada, ‘wag bigyan ng lisensya

@Editorial | October 28, 2023

Nakababahala ang ulat na umaabot sa 11,000 katao ang namamatay kada taon dahil sa mga aksidente sa kalsada.

Kaugnay nito, pinapatutukan na sa Land Transportation Office (LTO) ang road safety sa buong bansa.

Inatasan din ang ahensya na bigyang prayoridad ang kaligtasan ng mga pedestrian o mga naglalakad, lalo na ang mga bata, at tiyaking ligtas sila mula sa banta ng mga rumaragasang sasakyan.

Tinukoy din na ang napakataas na bilang ng mga namatay sa iba’t ibang bahagi ng bansa ay dahil sa mga road accident. At ang mga sangkot ay nakitaan ng mga pagkakasala na kinabibilangan ng drunk driving, over speeding, texting while driving, at iba pang risky human behavior. Sila ang mga pasaway na hindi dapat binibigyan ng pagkakataon na makapagmaneho.

Bukod sa pagtuturo ng defensive at safe driving sa mga kumukuha ng driver’s license, mainam din na mas higpitan ang pagbibigay ng lisensya. Hindi puwede ‘yung basta nakakapag-drive at may pambayad, okay na. Para naman sa mga nahuhuling lumalabag sa batas, dapat ay maturuan ng leksyon para mas maunawaan ang bigat ng responsibilidad sa pagmamaneho.

Isipin natin na hindi lang sariling buhay ang nakataya sa tuwing nagmamaneho sa kalsada kundi maging ang kaligtasan ng mga kapwa motorista at lahat ng nasa kalsada.