Mga kurso sa Senior High School at General Education curriculum, dapat repasuhin

ni Kuya Win Gatchalian @Win Tayong Lahat | June 12, 2025

Naghain ang inyong lingkod ng isang resolusyon na layong repasuhin ang pagkakapareho ng mga kursong itinuturo sa senior high school at sa General Education (GE) curriculum sa kolehiyo. Sa inihain nating Proposed Senate Resolution No. 1369, layunin nating magrekomenda ng mga polisiya at panukalang batas upang mapaikli pa lalo ang panahong kailangang gugulin ng mga mag-aaral sa kolehiyo.

Naniniwala ang inyong lingkod na kailangan na nating tuparin ang isa sa mga pangako ng K to 12 program: kasunod ng pagdagdag ng dalawang taon sa high school, mababawasan ang mga taong kailangang gugulin ng mga mag-aaral sa kolehiyo.

Mahalagang tiyakin nating hindi nauulit ang mga kursong kinukuha ng ating mga mag-aaral upang matutukan nila ang kanilang specialization at hindi na umabot sa apat na taon ang kolehiyo. Para sa inyong lingkod, hindi dapat maging pasanin para sa ating mga mag-aaral at kanilang mga pamilya ang mga dagdag na semestre dahil nabigo tayong tuparin ang mga pangako ng programang K to 12, lalo na’t 12 taon na ang lumipas simula nang ipatupad ito. Panahon na upang tuparin natin ang mga dating ipinangako sa ating mga mag-aaral at sa kanilang mga pamilya.

Ayon sa Second Congressional Commission on Education (EDCOM II), masyadong binibigyang-diin ng mga programa sa kolehiyo ang mga kurso sa GE, samantalang kulang naman ang internship at hands-on training. Batay din sa mga inisyal na resulta ng isang pag-aaral ng Philippine Institute for Development Studies (PIDS), mas maraming required courses sa ilalim ng mga programa sa Pilipinas kung ihahambing sa mga programa sa Association of Southeast Asian Nations (ASEAN), European Union (EU), at Australia.

Noong nagsagawa tayo ng pagdinig ukol sa pagpapatupad ng bagong curriculum ng senior high school, naghain ang inyong lingkod ng mga rekomendasyon upang mabawasan ang mga taong kailangang gugulin ng mga mag-aaral sa kolehiyo.

Isa sa ating mga panukala ang pagbabawas pa ng mga GE courses.

Sa kasalukuyan, hindi bababa sa 36 units ng GE ang kinukuha ng mga mag-aaral, ngunit hindi pa rin ito sapat upang mabawasan ang panahong kailangang ilaan ng ating mga mag-aaral sa kolehiyo. Iminungkahi rin natin na tiyaking ang mga paksang tinatalakay sa GE courses ay maituturo pa rin sa senior high school.

Kaya naman sa pagbubukas ng 20th Congress, ihahain ng inyong lingkod ang isang

panukalang batas upang mabawasan ang mga taon sa kolehiyo. Patuloy din nating tututukan ang pagpapatupad ng Department of Education (DepEd) ng bagong curriculum sa senior high school.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com