Mga homeless, binakunahan kontra COVID-19 ng DOH

ni Lolet Abania | September 29, 2022

Nagsagawa ng pagbabakuna ang Department of Health (DOH) ngayong Huwebes sa mga indibidwal na walang tirahan sa Quezon City para matulungan sila na maprotektahan laban sa COVID-19.

Pinangunahan mismo ni DOH Officer-in-Charge Maria Rosario Vergeire ang pagbabakuna sa mga homeless families sa Scout Santiago, Quezon City, kasama rin si Metro Manila Center for Health Development Assistant Regional Director Aleli Annie Grace Sudiacal.

Ito ay bahagi ng Bakunahang Bayan ng DOH na Special COVID-19 Vaccination Days na isinasagawa ng ahensiya hanggang Oktubre1.

Bukod sa COVID-19 vaccination, sinabi ng ahensiya na sinuri rin nila ang iba pang health concerns ng mga walang tirahang indibidwal gaya ng malnutrition, at ang routine immunization ng mga residente laban sa iba pang mga sakit.

Base sa national COVID-19 vaccination dashboard ng DOH, nasa 73 milyong Pilipino na ngayon fully vaccinated laban sa COVID-19 habang 19.3 milyon ang nakatanggap ng booster shots.