Mga gamit na face masks ng US, 'itinapon' sa 'Pinas, nasabat

ni Lolet Abania | October 22, 2020

Nakasabat ang Bureau of Customs (BOC) sa Port of Subic ng isang kargamento na naglalaman ng mga basura tulad ng gamit na face masks na nanggaling sa United States.

Gayundin, idineklara ng BOC ang shipment bilang “American old corrugated cartons for repulping” at consigned ito ng kumpanyang Bataan 2020, Inc.

“Pinalalabas lang na recyclable paper products pero basura ho talaga ‘to,” sabi ni BOC spokesperson Atty. Vincent Maronilla.

Ayon sa BOC, inihahanda na ang isasampang kaso laban sa Bataan 2020, Inc. dahil sa paglabag sa Republic Act No. 10863 o ang Customs Modernization and Tariff Act at iba pang kaugnay na violation sa environmental laws.

“Alam naman natin na US has the most number of cases and then number of deaths also tapos ‘yung trash nila nandito sa atin. So, napaka-unhygienic talaga.

Natakot nga kaming lumapit kasi baka contaminated ‘yan,” sabi ni Port of Subic District Collector Maritess Martin. Tumanggi namang magbigay ng komento ang Bataan 2020, Inc. tungkol sa insidente.

Gayunman, ayon kay Maronilla, ang nasabat na kargamento ng waste materials ay nakatakdang ibalik sa US. “‘Tong mga basurang ‘to, ibabalik natin sa exporter na nagparating sa atin,” sabi ni Maronilla.