Mga demonyo sa socmed, lagot kay Robin

ni Mylene Alfonso @News | October 12, 2026

Photo: File

Iginiit ni Senador Robinhood Padilla ang agarang pagpapatupad ng panukalang layuning limitahan ang paggamit ng social media ng mga menor-de-edad, bunsod ng mga problemang iniuugnay sa online interactions, kabilang ang bullying, mga kaso ng pagpapakamatay, at pamamaril sa mga paaralan.

Ayon sa senador, may mga “demonyo” sa social media na kailangang iligpit at may mga platform na maihahalintulad sa adiksyon. 

Nauna nang inaprubahan ng Senado sa ikatlo at huling pagbasa ang Senate Bill No. 2424, o ang panukalang Safe Media Access and Responsible Technology for Kids in Digital Spaces (SMART KIDS) Act.

Sa ilalim ng panukala, layong pagbawalan ang mga kabataang edad 17 pababa na gumawa ng sariling social media accounts, habang ang mga umiiral nang account ay kailangang i-disable o suspendihin. 

Layunin din nitong limitahan ang pag-access ng mga bata sa social media at iba pang digital application at website na itinuturing na mapanganib para sa kanila.