Medical cannabis laboratory, ready na

ni Fely Ng | April 27, 2023

Pinangunahan ni Dr. Richard Nixon Gomez, scientist at imbentor ng Bauertek Corporation, kasama ang media at kanilang binisita ang laboratoryo kung saan ipoproseso ang medical cannabis o marijuana upang gawing gamot.

Ito ay inaasahan umanong gamot para sa iba’t ibang uri ng sakit at malalang karamdaman tulad ng depresyon, epilepsy, Alzheimer’s disease, sleep disorder, anxiety at marami pang iba.

Matatagpuan ang pasilidad sa 9001 Bacood, Sta. Rita, Guiguinto, Bulacan.

Ayon kay Dr. Gomez, sakaling maisabatas na ang paggamit ng medical cannabis, handa ang laboratoryo sa pagproseso para gawing medical tablet at medical oil ang cannabis.

Maaari na umano itong isabay sa mga halamang gamot o food supplement na dati nang ginagawa simula pa noong itatag ang Bauertek Corporation noong Disyembre 16, 2019.

Inikot ng buong media mula sa radyo, TV, print at online, vloggers at ilan pang bisita ang laboratoryo.

Kasunod nito, isinagawa ang live Media Health Forum sa mismong studio na nakabase sa tanggapan ng Bauertek.

Sa ginanap na forum, naging panauhin sina Chuck Manansala, President, Masikhay Research; Lui Manansala, Co-Convenor ng Seniors for MedCan Philippines; Lea Fullon, Program Director ng Haraya Policy Center.