May nilulutong Part 2 ng Pacman-Mayweather

ni MC - @Sports | September 15, 2021

Malakas ang ugong na niluluto na ang Mayweather vs Pacquiao Part 2 bilang farewell fight ni Pambansang Kamao Manny Pacquiao na gagawin sa Disyembre o Enero sa pinagpipiliang venues na Pilipinas, America sa Middle East.

Hanggang ngayon ay hindi pa rin nawawala sa isip ng fans na isang araw ay makababawi ang Pinoy boxing icon kay Mayweahter na minsan ng naging box office hit sa pay-per-view kahit pa wala na sa peak ang kanilang mga career.

Matatandaang noong naglaban sila noong May 2, 2015, sa MGM Grand Garden Arena sa Las Vegas, Nevada, sumira ng record ang laban sa US na may 4.6 million PPV buys at $410 million sa revenue upang maging highest-grossing PPV sa history.

Nilabanan ni Mayweather si YouTube sensation Logan Paul noong June 6, 2021 sa Hard Rock Stadium sa Miami Gardens, Florida. Wala namang naging desisyon sa laban dahil isa lang itong exhibition bout.

Natalo naman si Manny Pacquiao kay Yordenis Ugas via 12-round unanimous decision, 116-112, 116-112, 115-113, sa kanilang labang tinawag na The Legend vs. The Olympian noong August 21, 2021, sa T-Mobile Arena sa Las Vegas, Nevada.

May ulat na maaaring magharap muli sina Mayweather at Pacman sa isang exbihition games lalo pa at hindi nawawala ang komento sa kanila ngayong nakabalik na sila sa limelight. “When I come and do an exhibition or come out and box and have some fun, I do it because I want to do it, not because I have to do it,” ani Mayweather kaugnay kay Pacquiao. “Whereas Pacquiao at his age, it’s sad that he has to fight. I’m financially set. I want to let everybody know this.”

Sumagot naman si Pacquiao sa patutsada ni Floyd: “Why would I try to fight an undefeated fighter if I’m chasing the paycheck? We know this is a real fight. I fight because this is my passion. I love beating undefeated fighters and bringing honor to my country. I’m not like some other guys who are in it just for the money."