May-aring si Rocha, wanted daw sa drug trafficking… CHAVIT, TULOY SA PAGBILI NG MISS UNIVERSE

ni Janiz Navida @Showbiz Special | january 6, 2026

Photo: SS / Live Interview

Ayaw sumuko ni dating Ilocos Sur Gov. Luis “Chavit” Singson sa panawagan sa kanyang tinatawag na ngayong “former friend” na si Pangulong Ferdinand “Bongbong” Marcos, Jr. na magbitiw na sa puwesto dahil sa mga kontrobersiyang ibinabato rito lalo na ang diumano’y pagiging “mastermind” nito kasama ang pinsang si dating Speaker Martin Romualdez sa flood control scandal.

Kahapon, muling nagpatawag ng press conference si Manong Chavit sa Club Filipino sa Greenhills at inisa-isa ang mga diumano’y ebidensiyang nagpapatunay ng direktang kaugnayan ni PBBM sa korupsiyon sa bansa, na pumutok nga at nakalkal dahil sa mga ghost flood control projects ng pamahalaan na palpak naman.

May inihanda pang AVP (audio-visual presentation) ang team ni Manong Chavit para isa-isahin ang mga dokumentong nag-uugnay sa pangulo, sa anak nitong si Cong. Sandro Marcos at sa pinsang si ex-Speaker Romualdez sa controversial na flood control scam.

Ayon sa dating pulitiko-philanthropist, kinabukasan ng kabataan at ng ating bayan ang kanyang ipinaglalaban kaya patuloy siyang nag-iingay at nanawagang sumuporta ang taumbayan sa gagawing “one time, bigtime rally” soon.

Hindi naman daw pagpapabagsak o pagsira sa gobyerno ang kanyang hangad kundi ang maparusahan ang mga korup na nagnakaw sa kaban ng bayan.

In fact, may pakiusap at hamon si Manong Chavit sa mga lider ng militar at pulis na sina Armed Forces of the Philippines (AFP) Chief of Staff General Romeo Brawner, Jr. at Philippine National Police (PNP) Chief Jose Melencio Nartatez, Jr. na umaksiyon na sa sitwasyon ngayon ng ating bayan para raw sa kinabukasan hindi lang ng kanilang mga anak kundi ng ating bayan.

Ani Manong Chavit, “Nakikiusap ako sa mga military at police, may mga anak din kayo. I would suggest na from now on, mag-usap-usap muna kayo (Gen. Brawner at Gen. Nartatez) bago kayo ipatawag sa Malacañang. Mag-isip kayong mabuti. 

“Isipin n’yo ang kinabukasan ng ating mga anak. Isipin n’yo ang ating nasyon. Kung wala kayong malasakit sa Pilipinas, ibang klase na ‘yun.” 

Dagdag na hamon pa nito sa dalawang lider ng militar at kapulisan, “So, isipin n’yong mabuti kung sasama kayo sa mga korup o sasama kayo sa ikabubuti ng bansa. You’re welcome to join us in that rally kasi ‘di naman natin paaalisin, eh, wala tayong iba-violate na constitution. Sabihin n’yo lang, ayaw n’yo ng graft and corruption… in public!

“You should announce na ayaw n’yo ng nangyayari, kung hindi, may ibig sabihin ‘yan. Involved din sila sa korupsiyon.”

Samantala, nahingi rin namin ang reaksiyon ni Manong Chavit sa recent statement ng CEO ng Miss Universe na si Mr. Raul Rocha na “delusional” daw ang businessman-philanthropist sa sinabi nitong desidido siyang bilhin ang Miss Universe Organization para makatulong sa turismo ng Pilipinas.

Pahayag ni ex-Gov. Chavit, “Si Rocha, wanted na ‘yun, may kaso, drug trafficking. So, si Anne (Jakrajutatip, ang Thai businesswoman na isa pang may-ari ng MUO), nasentensiyahan na rin, walang bumili ng Miss Universe. Sentensiyado na 2 ½ years, if I’m not mistaken. Si Rocha, wanted for drug trafficking, saka maraming kaso.”

At sa tanong namin kung itutuloy pa rin ba niya ang pagbili sa MUO, “Yes, nagpunta rito sa Pilipinas ‘yung mga dating opisyal ng Miss Universe at sinabi ko nang gusto kong bilhin. Mabibili pero marami kaming dadaanang (challenges) dahil sinabi nga, maraming kaso. So, I think ‘yung may hawak ng Miss Universe ngayon, ‘yung mga pinagkautangan nila.”

Sa sinabi ni Rocha na sasampahan niya ng mga kaso si Manong Chavit, sagot nito, “Pa’no niya ako sasampahan ng kaso, nakakulong nga?”

Pahayag naman ng anak ni ex-Gov. Chavit na si Ms. Steph Singson, “The social media account is held by Raul’s team pa kasi. So very soon, it will be legally taken from them. He is on the defense now. 

“Access to Miss Universe social media account will also be taken away from them soon.”

Oh, ayan, klaro na, ha?! Hindi lang nag-iilusyon si Manong Chavit at desidido talaga siyang mabili ang Miss Universe Organization.

---

BAGONG PANGULO AT OPISYALES NG SPEED, PINANGALANAN NA

HINIRANG ng grupong SPEEd ang bagong pangulo at iba pang opisyal nito kasabay ng pagsisimula ng taong 2026.

Inihalal ng Society of Philippine Entertainment Editors (SPEEd) si Tessa Mauricio-Arriola, lifestyle at entertainment editor ng The Manila Times, bilang bagong pangulo.

Pinamumunuan na ngayon ni Mauricio-Arriola ang organisasyong nagsimula bilang isang social club ng mga entertainment editors mula sa mga pambansang broadsheet, nangungunang tabloid, at mga pangunahing online portal.

Ang SPEEd ay itinatag ng yumaong Manila Standard entertainment editor na si Isah V. Red, na nagsilbi ring president emeritus ng grupo.

"Sa aming bagong hanay ng mga opisyal, nais naming sumulong nang may matapang na pananaw, ngunit kasabay nito ay manatiling tapat sa mga pinahahalagahang palaging gumagabay sa SPEEd at patuloy na sumusuporta sa direksiyong pinaniniwalaan ng grupo," sabi ni Mauricio-Arriola.

Kasama niya sa bagong hanay ng mga opisyal sina Maricris Nicasio ng Hataw (bise presidente—internal) at Gerardine Trillana ng Malaya Business Insight (bise presidente—external).

Sina Ervin Santiago ng Inquirer Bandera at Rohn Romulo ng People’s Balita ay nahalal na mga kalihim, habang sina Dondon Sermino ng Abante TnT at DWAR1494 at Anna Pingol ng Pika-Pika at Pilipino Star Ngayon ay magsisilbing mga ingat-yaman. Si Jerry Olea ng PEP ay itinalaga naman bilang auditor.

Ang mga inihalal na PRO ng grupo ay sina Nickie Wang ng Manila Standard, na muling nahalal, Neil Ramos ng Tempo at Janice Navida ng Bulgar.

"Habang pumapasok tayo sa isang bagong kabanata, nananatili tayong nakatuon sa pagsuporta sa mga komunidad at, sa pamamagitan ng taunang Eddys, patuloy na pinararangalan ang mga manggagawa sa industriya ng pelikula na siyang dahilan kung bakit posible ang mga makabuluhang kuwentong ito," dagdag ni Mauricio-Arriola.

Ang beteranong mamamahayag na si Nestor Cuartero ng Tempo, Manila Bulletin, at The Market Monitor, ay patuloy na nagsisilbing tagapayo ng SPEEd.

Kabilang sa mga miyembro ng konseho ng mga nakaraang pangulo sina Ian Fariñas ng People’s Tonight, Eugene Asis ng People’s Journal, Salve Asis ng Pilipino Star Ngayon at PangMasa.

Ang iba pang miyembro ay kinabibilangan nina Dinah Sabal Ventura ng Daily Tribune, Jun Lalin ng Abante, Nathalie Tomada ng The Philippine Star, Bobby Requintina ng Manila Bulletin, Dindo Balares, retiradong editor ng Balita, at Rito Asilo, retiradong editor ng Philippine Daily Inquirer.