May-ari ng talyer, may pananagutan sa pagkawala ng sasakyan ng kliyente

ni Atty. Persida Rueda-Acosta - @Magtanong Kay Attorney | July 11, 2020

Dear Chief Acosta,

Nagpagawa ako ng sasakyan last week sa isang talyer. Ayon sa aming usapan, kailangan ko balikan ang aking sasakyan matapos ang limang araw para ito ay magawa. Subalit, nang balikan ko para kunin na ito ay sinabihan ako ng may-ari na nanakaw daw ang sasakyan ko. Sinubukan kong igiit sa may-ari ng talyer na may pananagutan siya sa pagkawala nito pero mariing itininanggi niya ang anumang pananagutan sapagkat ito ay fortuitous event o hindi sinasadyang pangyayari. Nais kong malinawan kung sapat ba talagang depensa na fortuitous event ang nangyari upang makaiwas ang talyer sa pananagutan? – Brendo

Dear Brendo,

Ang sagot sa iyong katanungan ay hindi po. Una sa lahat, ang carnapping ay hindi kaagad maaaring maikonsidera bilang fortuitous event. Bilang suporta sa naturang pahayag, sinabi ng Korte Suprema sa kasong Co vs. Court of Appeals (G.R. No. 124922 June 22, 1998, Ponente: Honorable former Associate Justice Antonio Martinez), na ang carnapping ay hindi awtomatikong maituturing na fortuitous event, viz:

“It is a not defense for a repair shop of motor vehicles to escape liability simply because the damage or loss of a thing lawfully placed in its possession was due to carnapping. Carnapping per se cannot be considered as a fortuitous event. The fact that a thing was unlawfully and forcefully taken from another's rightful possession, as in cases of carnapping, does not automatically give rise to a fortuitous event. To be considered as such, carnapping entails more than the mere forceful taking of another's property. It must be proved and established that the event was an act of God or was done solely by third parties and that neither the claimant nor the person alleged to be negligent has any participation.” (Binigyang-diin)

Upang maituring na fortuitious event ang naganap na carnapping, maliwanag sa nabanggit na desisyon ng Korte Suprema na nararapat mapatunayan ng talyer na wala itong naging kapabayaan na maaaring mag-ambag sa pagkawala o pag-carnap ng sasakyan ng kliyente.

Bukod pa rito, nabanggit din sa kaparehong kaso na ang carnapping diumano ay isang karaniwang “business risk” sa mga nagnenegosyo ng talyer. Nangangahulugan lamang na sa pagtanggap ng may-ari ng talyer ng inyong sasakyan upang ito ay maayos, hindi lamang ito obligado na ayusin ang inyong sasakyan kundi obligasyon din nito ang magbigay ng kaukulang seguridad sa inyong sasakyan bilang ari-arian ng kliyente. Dahil dito, maaari pa ring managot ang talyer kahit pa ituring natin na fortuitous event ang naganap na carnapping:

“It must likewise be emphasized that pursuant to Articles 1174 and 1262 of the New Civil Code, liability attaches even if the loss was due to a fortuitous event if "the nature of the obligation requires the assumption of risk". Carnapping is a normal business risk for those engaged in the repair of motor vehicles. For just as the owner is exposed to that risk so is the repair shop since the car was entrusted to it.” (Ibid.)

Dahil puwedeng mapanagot ang may-ari ng talyer sa pagkawala ng inyong sasakyan habang nasa kustodiya niya ito ay puwede kayong magsampa ng demanda sa korte para makahingi ng danyos.

Nawa ay nasagot namin ang inyong mga katanungan. Nais naming ipaalala sa inyo na ang opinyong ito ay nakabase sa mga naisalaysay sa inyong liham at sa pagkakaintindi namin dito. Maaaring maiba ang opinyon kung mayroong karagdagang impormasyon na ibibigay. Mas mainam kung personal kayong sasangguni sa abogado.