Mas ramdam na naman ang 'flood scam'

by Info @Editorial | August 10, 2026

Muling nilubog ng matinding pagbaha ang maraming komunidad kasunod ng mga nagdaang bagyo at walang tigil na pag-ulan dulot ng habagat. 

Ngunit hindi na sapat na sisihin lamang ang panahon. Taun-taon ay pareho ang eksena: binabaha ang mga kalsada at kabahayan, naaantala ang trabaho at klase, nawawalan ng kabuhayan ang mga pamilya, at nalalagay sa panganib ang buhay. 

Sa kabila ng paulit-ulit na pangako ng mga flood control project at disaster preparedness programs, bakit tila hindi pa rin handa ang bansa sa problemang matagal nang alam na darating?

Hindi maikakaila ang epekto ng climate change at mas matitinding pag-ulan, ngunit hindi ito dapat maging palusot sa kapalpakan ng sistema. 

Kung bilyun-bilyong piso ang inilaan para sa flood control, drainage, river rehabilitation, at iba pang imprastraktura, nararapat lamang na makita ng publiko ang resulta. 

Hindi dapat maging normal ang isang problemang paulit-ulit na nilulutas sa papel ngunit hindi nararamdaman sa aktuwal na buhay.

Panahon nang lumampas sa puro relief operations, photo opportunity, at pangakong “mas pagbubutihin pa.” Ang kailangan ng mamamayan ay konkretong solusyon, maayos na urban planning, epektibong flood control, pangangalaga sa mga ilog at watershed, at higit sa lahat, pananagutan. 

Kung taun-taon na lamang lulubog ang mga komunidad, hindi na sapat ang sabihin na kalamidad ito—kailangang itanong kung sino ang nagpabaya at bakit hanggang ngayon ay wala pa ring tunay na pagbabago.