Kapag langis ang tumaas, lahat nagmamahal

by Info @Editorial | September 24, 2026

Hindi kailangang may sasakyan ang isang Pilipino para maramdaman ang mega oil price hike. Sapat nang mamili siya ng pagkain.

Nagsisimula nang magmahal ang ilang grocery items kasabay ng malalaking pagtaas sa presyo ng petrolyo. Hindi ito nakapagtataka. Halos lahat ng produkto ay dumadaan sa trak, delivery van, bodega at tindahan bago makarating sa mamimili. Kapag mahal ang diesel at gasolina, tumataas ang gastos sa transportasyon at distribusyon—at kadalasang ang mamimili ang sumasalo nito.

Dito nagiging seryosong problema ang oil price hike. Ang unang tama ay nasa gasolinahan; ang susunod ay nasa grocery at hapag-kainan.

Totoong malaking bahagi ng galaw ng presyo ng langis ay nakasalalay sa pandaigdigang merkado. Ngunit kontrolado ng pamahalaan kung paano nito poprotektahan ang publiko sa epekto nito. Kailangang bantayan ang hindi makatwirang pagtataas ng presyo, pigilan ang profiteering, at gamitin ang mga nararapat na hakbang upang mabawasan ang pasanin sa transportasyon, agrikultura at iba pang sektor na direktang tinatamaan ng mahal na petrolyo.

Hindi rin dapat gawing dahilan ang oil price hike para sa walang habas na pagtaas ng presyo ng mga bilihin. Kailangang malinaw kung alin ang lehitimong dagdag-gastos at alin ang pagsasamantala.

Kapag pareho ang sahod ngunit tumataas ang langis, pamasahe at pagkain, iisa ang resulta: paliit nang paliit ang kayang bilhin ng bawat piso.

Kapag langis ang tumaas, lahat sumusunod. Ang hamon sa gobyerno: huwag hayaang ang ordinaryong Pilipino ang laging huling sumalo ng bigat.