Marcos, excited sa oportunidad ng Pilipinas sa semiconductor industry

by BRT @News | October 9, 2026

Photo: Courtesy Agence France-Presse / Bongbong Marcos FB

Excited si Pangulong Ferdinand Marcos Jr. sa oportunidad na makukuha ng Pilipinas sa US-led Pax Silica initiative upang mapalawak ang papel ng bansa sa paggawa at pag-develop ng semiconductor chips.

Ayon kay Marcos, nais ng Pilipinas na hindi lamang gumawa ng semiconductor chips kundi makilahok din sa research, design at development ng teknolohiya.

Sinabi niya ito sa 24th Forbes Global CEO Conference sa Singapore nitong Huwebes.

Ang Pax Silica ay inisyatiba ng United States para palakasin ang supply chain ng semiconductors, artificial intelligence (AI) at iba pang mahahalagang teknolohiya.

Noong Abril, sumali ang Pilipinas sa inisyatiba at iminungkahi ang pagtatayo ng semiconductor at advanced manufacturing hub sa New Clark City, Tarlac.

Tinatayang aabot sa $40 bilyon hanggang $70 bilyon ang posibleng pamumuhunan sa proyekto at halos 200,000 trabaho ang maaaring malikha sa susunod na 10 taon, ayon sa Bases Conversion and Development Authority (BCDA). Proyeksiyon pa lamang ang mga bilang na ito.