Maja at Rambo, girl ang first baby

ni Eli San Miguel - Trainee @Entertainment | February 1, 2024

Masayang ibinahagi ng mag-asawang sina Maja Salvador at Rambo Nuñez ang kanilang gender reveal party kamakailan.

Nag-upload si Maja ng isang video sa Instagram na ginawa ng Raconteur Films na nagtatampok ng mga kaganapan sa kanilang gender reveal party.

Puno ang selebrasyon ng mga kilalang personalidad sa isang pribadong resort kung saan kulay puting mga dekorasyon ang nangingibabaw. Mayroong puting lobo, upuan, at kumot patungo sa entablado kung saan ibinunyag nina Maja at Rambo ang gender ng kanilang unang anak na may palayaw na B-Dragon.

Nagsuot ang ilang bisita ng mga kasuotang may kulay na tugma sa kanilang hula. Ang mga bisita na kumpiyansang lalaki ang baby ay nagsuot ng asul, habang ang iba naman ay nagdamit ng pink para sa inaasahang baby girl.

“Kahit ano, kasi si B-Dragon siya,” pahayag ni Maja at pabirong nagsabi ng “Rawr!”

Sa huli, nagtagumpay ang Pink team nang ihayag nina Maja at Rambo ang kasarian ng kanilang anak. Ginawa ito sa pamamagitan ng pagbukas ng isang kahon na naglalaman ng isang relo na may kulay pink sa loob.