Magpa-pasko na, wala pa ring National ID

ni Judith Sto. Domingo @Asintado | September 14, 2023

Pumasok na ang tinatawag na “ber months” o mga buwang nagtatapos sa “ber”.

Muling naglulutangan sa ating social media ang mga litrato at “memes” ng nagising na namang ‘simbolo’ ng Kapaskuhan sa Pilipinas, walang iba kundi ang ating kinagigiliwang singer na si Jose Mari Chan.

Ilang buwan na lamang at yayakapin na tayo ng simoy ng Pasko.

Ngunit ang tanong, “Darating kaya ang mga ipinangako ng gobyerno sa ating mga kababayan para maibsan o mapaigi-igi kahit man lang kaunti ang mahirap nilang kalagayan?”

Isa sa milyun-milyong nagtatanong n’yan ngayon ay ang nag-alaga sa aking namayapang nanay Elizabeth.

Ang caregiver ni nanay ay tila anghel na dumating sa aming buhay, gaya ng kanyang pangalang Angelita o Angelita Nabua. Siya ay tubong Pangasinan at matagal nang residente ng Pablo Ocampo Sr. (dating Vito Cruz) sa Maynila. Limang taon niyang matiyagang inalagaan si nanay na parang sarili niyang magulang -- pinapakain, ipinapasyal, pinapasaya at pinaglilingkuran sa araw-araw hanggang sa tuluyan nang manghina sa sakit na Alzheimer’s disease si nanay noong 2019.

Sa darating na Disyembre, nakatakdang magdiwang ng kanyang ika-60 na kaarawan si Angelita.

Sabi niya sa amin, excited na siya dahil sa wakas, makakakuha na siya ng mga benepisyong inilalaan ng batas para sa mga senior citizen.

Pero ang kasiyahan niya ay nabalot ng lungkot dahil isa siya sa libu-libong Pinoy na walang katibayan ng kapanganakan o birth certificate sa talaan ng Philippine Statistics Authority (PSA).

Wala rin siyang pinanghahawakang marriage certificate na makapagpapakita rin sana ng petsa ng kanyang pagsilang.

Heto pa, ang inaasahan ni Angelita na magiging mabisang katibayan ng kanyang pagiging senior citizen, sa kasamaang palad ay hindi pa rin dumarating — ang National ID o Philippine ID na isang taon na niyang hinihintay at hanggang ngayon ay napakailap pa rin.

Kaya mapipilitan siyang bumiyahe sa kanyang bayan sa San Fabian, Pangasinan para ayusin at isumite ang mga kinakailangang dokumento upang mai-record ng PSA ang kanyang kapanganakan.

Milyun-milyong pang mga “Angelita” sa ‘Pinas ang nananaghoy para makuha ang kanilang National ID, na inaasahan sana nilang pinakasimple, madali at mabilis nilang dokumento sa pagkuha ng benepisyo ng pamahalaan tulad ng mga itinalaga para sa mga senior citizen.

Nawa ang presensya ng National ID ay dumating na bago pa man ang simoy ng Kapaskuhan dahil bawat araw ng paghihintay ay pagkaantala ng tulong at karapatan ng ating mga kababayan.

---

Kung may reaksyon, sumbong o katanungan, sumulat sa ASINTADO ni Judith Sto. Domingo sa BULGAR Bldg., 538 Quezon Ave., Quezon City o mag-email sa asintado.bulgar@gmail.com.