Magnolia Yana tampok sa Condition Race

ni Green Lantern - @Renda at Latigo | February 03, 2022

Tatlong Condition races ang pakakawalan ngayong araw ng Huwebes sa Metro Turf, Malvar - Tanauan City, Batangas.

Anim na kabayo ang magtatagisan sa Condition Race (21) na aarangkada sa unang karera kung saan inaasahang si Magnolia Yana ang magiging paborito sa laban.

Sasakyan ni class A jockey JA Guce, makikilatis ang tikas ni Magnolia Yana kontra limang tigasing kabayo sa distansyang 1,400 meter race.

Makikipagtagisan din ng bilis sina Viscerion, Sierra Madre, Tagpuan, Celebrity at Rain Rain Go Away sa event na suportado ng Philippine Racing Commission, (PHILRACOM) sa pamumuno ni chairman Reli De Leon. Walong kabayo ang magbabanatan sa Condition Race (23) na ikakasa sa pangatlong karera, inaasahan naman si Morning Girl na gagabayan ni NJ Esteban ang magiging liyamado sa laban.

May habang 1,400 meter race, makakalaban ni Morning Girl ay sina Blue Label, Nasayona Anglahat, Double Rock, Lady Sansa, Sir Jason, Yoshiko at Kusing.

Samantala, tiyak na aabangan din ng mga karerista si Sky Candy na sasabak sa Condition Race (16) sa pang-anim na karera.

Rerendahan ni class A rider JA Guce, posibleng magbigay ng magandang laban kay Sky Candy sina Born To Run, Namayan at Vivid Pink sa distansyang 1,400 meter race.

Maliban sa mga nabanggit na kabayo, ang ibang kalahok ay sina Will To Win, Aliwagwag Falls, Blackburn, Stranvinsky at Silab.

"Magandang laban 'yan, tiyak na mapapalaban si Sky Candy kina Born To Run, Vivid Pink at Namayan," saad ni Rodelio Manansala, veteran karerista.

Samantala, walong balanseng karera ang inihain ng Metro Manila Turf Club Inc. (MMTCI) ngayong araw ng Huwebes kaya pihadong masaya ang mga karerista sa kanilang paglilibang.

Mga Pili ni Green Lantern:

Race 1. Magnolia Yana (5), Tagpuan (3),

Race 2. Wthin Reach (10), Arubaitosan (8), Since When (1)

Race 3. Morning Girl (1), Kusing (8), Double Rock (4)

Race 4. Geneva (5), Kid Kensin (1), Blue Label (2)

Race 5. Caraga Wonder (9), Smiling Lady (5), Laughing Tiger (8)

Race 6. Sky Candy (9), Namayan, (3), Born To Run (8)

Race 7. Happy Go Lucky (12), House Of Hold (10), Union Run (4)

Patok - Sky Candy

Pandehado - Geneva, Caraga Wonder