Magigising tayo isang umaga, wala nang Omicron

ni Ka Ambo - @Bistado | January 17, 2022

MAGKAKAIBA ang datos at opinyon ng mga eksperto kaugnay ng COVID-19 at Omicron variant.

Nagkaletse-letse na talaga!

◘◘◘

ANO ang sinaunang Tagalog sa virus?

Kagaw o singaw.

Ang singaw na dulot ng panahon ay biglang dumarating at bigla ring naglalaho.

Magigising tayo isang umaga, wala nang COVID-19, wala nang Omicron variant!

◘◘◘

UMABOT sa Japan ang 3-meter high na tsunami mula sa sumabog na Bulkan sa Tonga.

Isang kalamidad na mahirap hulaan!

◘◘◘

MAGHA-HOUSE-to-house raw sa vaccination.

Malaki ang tama ninyo!

◘◘◘

MARAMI na ang tuliro sa pangangampanya dahil sa Omicron variant.

Sa totoo lang, hindi naman sa buong bansa, bagkus ay sa ilang lugar lang!

◘◘◘

HUMABA nang todo ang Christmas break ng mga estudyante.

Sinundan ito ng “health break”!

◘◘◘

MAGING ang mga opisina — pribado man o publiko ay nagsipagsarado.

Sino ang may sabing mas grabe ang Delta kaysa sa Omicron variant?

◘◘◘

WALANG nakakaligtas sa Omicron variant.

Kahit sino at kahit nagsosolo sa silid ay tinatamaan ng mild symptoms.

Kapag may sipon o ubo, sino ang magpapasok sa iyo sa trabaho?

◘◘◘

NAGTETENGANG-kawali ang gobyerno sa patutsadang ilibre ang RT-PCR test at mamigay ng libreng paracetamol.

Ganyang kahina ang kukote ng mga kumag!

◘◘◘

MARAMI pang epidemya na darating.

Pero, ang gobyerno ay palpak pa rin!

◘◘◘

KAAWA-AWA naman ang mga paslit na tinatamaan ng COVID-19.

Wala silang depensa sa krisis!

◘◘◘

MAHIRAP maabutan ang iskor ni BBM sa survey.

Kalaban na lang niya ngayon ay inner pressure at kalikasan!

◘◘◘

MAGING si Mayor Sara ay kayod-marino.

Baka kasi siya maabutan ni Tito Sen!

◘◘◘

KAPAG kasi nagpumilit ang ilang maka-Sara na i-junk si Marcos, posibleng mag-boomerang ito.

At ang resulta, makasisilat si Sotto!