Magdyowa, naglalakad, hinoldap ng 2 riding-in-tandem

ni Maeng Santos @News | October 22, 2026

Photo: Circulated / CCTV

Isang magkasintahan ang sugatan nang holdapin ng apat na armadong suspek na sakay ng dalawang motorsiklo sa Caloocan City.

Sugat sa braso, tuhod, at kamay ang tinamo ng 22-anyos na college student at edad 20 niyang kasintahan matapos hindi agad ibigay ang bag na dahilan upang gamitan sila ng dahas ng mga suspek.

Sa ulat ng tanggapan ni NPD Director P/BGen. Benliner Capili, naglalakad pauwi ang magkasintahan sa San Diego St., Brgy. 88, nang sumulpot ang mga suspek na sakay ng dalawang motorsiklo, alas-2:20 ng madaling-araw.

Inagaw ng mga suspek na armado ng baril at patalim ang bag na dala ng lalaki na kinalalagyan ng mamahaling gadget, cash, at personal na gamit na aabot sa halagang P100,000 bago tumakas patungong 11th Avenue.

Pinag-aaralan na ng mga tauhan ni Caloocan Police Chief P/Col. Joey Goforth ang kuha ng CCTV ng barangay na nakahagip sa pangyayari para matukoy ang pagkakakilanlan at madakip ang mga suspek.