Local producers, protektahan vs. ganid na traders at korup na gov’t offc’l

@Editorial | May 19, 2023

Nanawagan na rin ang grupo ng mga magmamanok sa gobyerno na magpatupad ng pansamantalang pagtigil ng pagpapalabas ng import permits para sa mga manok.

Ito ay dahil nakararanas na umano ang bansa ng labis na suplay ng karne ng manok sa mga pamilihan.

Kung ipatitigil ang pagbibigay ng chicken imports, masusuportahan ang mga local producers.

Una nang sinabi na maaaring ipatupad ang ganitong hakbang, hindi lamang sa mga karne ng manok kundi maging sa iba pang produkto kapag mayroong mataas na suplay nito.

Batid natin na grabe na ang sakripisyo ng mga local producers. Tila wala silang magawa sa tuwing bumabaha ng imported products.

Hindi na rin nila malaman kung paano mag-a-adjust. Ang laging senaryo, kapag nakapasok na ang mga imported, pikit-mata na nilang ibinabagsak ang presyo ng kanilang produkto para lang hindi mabulok.

Laging sinasabi na ang mga kababayan nating nasa agrikultura ang lakas at dahilan kung bakit mayroon tayong naihahain sa hapag, pero bakit parang hindi sila kayang protektahan at suportahan?

Umaasa tayo na darating din ang isang gobyerno na mas kaya silang ipaglaban mula sa mga ganid na traders at mga korup na opisyal.