Liza, agaw-pansin sa SAG Awards

ni Eli San Miguel - Trainee @Entertainment | February 26, 2024

Pinagkaguluhan ng mga photographers si Liza Soberano nang rumampa siya sa 2024 Screen Actors Guild Awards na ginanap sa Los Angeles, California.

Ibinahagi sa Instagram ng fashion designer na si Pamella Roland ang larawan ni Liza na suot ang isa sa kanyang mga obra mula sa Pre-Fall 2024 collection. Ito’y isang eleganteng two-toned gown.

“#LizaSoberano looks breathtaking at tonight’s 2024 #SAGAwards in our Pre-Fall 2024 blush Mikado gown with black embroidered bodice,” saad niya sa caption.

Si Maeve Reilly naman ang stylist ni Liza para sa nasabing okasyon, na kilala rin bilang stylist ng sikat na mga artista tulad nina Megan Fox, Jennifer Hudson, Eva Longoria, at iba pa.

Kasama si Liza sa mga cast ng Hollywood movie na "Lisa Frankenstein" kung saan kasama niya si Kathryn Newton.

Umani ng papuri ang pagganap ni Liza bilang si Taffy at ito’y napansin din ng American filmmaker na si Joe Russo.