ni Eli San Miguel - Trainee @Entertainment | March 4, 2024
Dumalo si Lisa Manoban ng BLACKPINK sa ikalawang gabi ng “The Eras Tour” concert ni Taylor Swift sa Singapore.
Ipinost ni Lisa sa Instagram ang kanyang mga litrato sa concert. Kabilang sa post ang nag-viral na backstage photo kung saan kasama niya ang American popstar.
"Had such a blast at The Eras Tour! Amazing performance," saad niya sa caption.
Kasamang nagpunta ni Lisa sa concert ang kanyang mga kaibigan at kapwa Thai K-pop idol na si Sorn.
Bago maging fangirl sa concert ni Taylor, pumunta muna si Lisa sa "SHINee World VI: Perfect Illumination” na concert ng K-pop group na SHINee, na ginanap din sa Singapore.
Kasalukuyan namang nasa Singapore si Taylor upang mag-perform ng anim na sold-out concert para sa Southeast Asia stop ng kanyang "The Eras Tour." Nag-umpisa ang kanyang show sa Lion City noong Sabado, Marso 2.