Lady Titans, kampeon sa 20th NAASCU Volleyball

ni Anthony E. Servinio - @Sports | November 30, 2022

Kinorohan bilang mga kampeon ang Enderun Colleges Lady Titans at Philippine Christian University Dolphins sa matagumpay na pagtatapos ng 20th National Athletic Association of Schools, Colleges and Universities (NAASCU) Volleyball Tournaments for Women and Men Lunes sa Technological University of the Philippines-Taguig Gym.

Ito ang mga unang kampeonato ng mga paaralan matapos ang ilang taong pagkabigo sa liga.

Kinumpleto ng Lady Titans ang kanilang perpektong torneo sa pagwalis sa TUP lady Grayhawks sa Game Two ng seryeng best-of-three, 25-19, 25-10 at 25-16 para sa ika-pitong sunod na panalo kung saan wagi rin sila sa lahat ng 21 set.

Isang mas mabangis na PCU ang dumating at hindi na pinagbigyan ang palaban na St. Clare Saints, 27-25, 25-21 at 25-19. Kabaligtaran ito ng Game 1 kung saan nagtrabaho ang Dolphins upang mauwi ang panalo na umabot ng limang set noong Nob. 25.

Napiling Women's Most Valuable Player si Shane Carmona at Best Coach si Ariel “Dong” dela Cruz ng Enderun. Ang mga kakamping sina open spiker Erika Deloria, opposite spiker Demure Orito, setter Rhean Almendralejo at libero Jen Dulay ay naging bahagi ng Mythical Team kasama sina open spiker Chezka Pingol ng TUP at middle blockers Leanne Colocar ng TUP at Ricky Mae Ballarta ng St. Clare College.

Dobleng karangalan ang napunta kay setter Kenneth Gubot na Men's MVP at kasapi ng Mythical Team. Sinamahan siya ng mga kapwa Dolphin na sina open spiker Christian Alicante, middle block Nephi Cagayan at libero Emil dela Carcel at sina opposite spiker John Laurence Baguasan at open spiker John David Torres ng Saints at middle blocker Kenneth Suncio ng TUP habang Best Coach si Gilbert “Butch” Odron ng PCU.