Koreano, nadale... 3 'MC taxi rider' nangholdap

ni Gina Plenago @News | November 2, 2026

Photo: File

Huli ng mga operatiba ng Parañaque City Police ang isa sa tatlong armadong holdaper na nangholdap sa Korean national, Sabado ng gabi sa Parañaque City.

Nahuli ng mga tauhan ni Parañaque police chief P/Col. Nicolas Piñon, si alyas Ramon sa kahabaan ng Macapagal Blvd., nakatakas naman ang dalawa pa niyang kasama na magkaangkas sa motorsiklo.

Sa ulat na nakarating kay SPD Director P/BGen. Rodel Pastor, alas-9:15 ng gabi nang harangin ng tatlong suspek ang 46-anyos na dayuhan habang naglalakad sa kahabaan ng Macapagal Blvd. sa Brgy. Tambo.

Agad nagdeklara ng holdap ang mga suspek, nanlaban ang dayuhan hanggang magpaputok ng baril ang isa sa mga holdaper agad ibinigay ng biktima ang bag na naglalaman ng P12,000.

Ang putok ng baril ay narinig ng mga nagpapatrulyang pulis kaya mabilis silang nakapagresponde sa lugar na nagresulta sa pagkakahuli sa isa sa mga suspek habang nakapuslit ang dalawa, tangay ang salapi ng biktima.

Narekober ang isang kalibre .9mm Glock na baril, ilang mga bala, dalawang itim na bonnet, uniporme ng isang transport service, iba’t ibang uri ng plate number, at ang gamit na itim na motorsiklo ng suspek.

Pinuri naman ni National Capital Region Police Office (NCRPO) OIC P/BGen. Christopher Abrahado ang Parañaque police sa mabilis na pagresponde sa krimen habang nanawagan din siya sa mga transport network companies na higpitan ang kanilang patakaran sa pamamahagi o pagbebenta ng uniporme ng kanilang mga driver.