Kenyan Kipruto at Yehualaw champ sa TCS London Marathon

ni Anthony E. Servinio - @Sports | October 4, 2022

Dalawang bagong pangalan sa katauhan nina Amos Kipruto ng Kenya at Yalemzerf Yehualaw ang itinanghal na kampeon sa 2022 TCS London Marathon, Lunes ng umaga (oras sa Pilipinas). Pinangunahan ng pares ang tinatayang mahigit 40,000 mananakbo para magsimula ng bagong kabanata sa kasaysayan ng tanyag na takbuhan na nagtapos sa The Mall.

Humataw si Kipruto at tumawid sa finish line sa oras na 2:04:39 sa kabuuang 42.195 km. Pangalawa si Leul Gebresilase ng Ethiopia sa 2:05:12 at pangatlo si Bashir Abdi ng Belgium sa 2:05:19.

Si Kipruto ang nanalo ng medalyang pilak sa 2020 Tokyo Olympics Marathon sa likod ng kababayang si Eliud Kipchoge. Hindi naglaro si Kipchoge at kagagaling lang niya sa pagtala ng bagong world record para sa 42.195 kilometro na 2:01:09 noong nakaraang linggo lang sa 2022 BMW Berlin Marathon sa Alemanya.

Sa edad na 23, si Yehualaw ang pinakabatang kampeon ng karera subalit kinailangan niya munang dumaan sa kaunting peligro. Natalisod siya na may 10 kilometro ang nalalabi ngunit bumangon siya agad, humabol sa mga kasama at magwagi sa oras na 2:17:25.

Isa sa mga nilampasan niya ang defending champion Joyciline Jepkosgei na pumangalawa lang sa 2:18:06. Pangatlo ang isa pang Ethiopian Alemu Megertu sa 2:18:32.

Bago magsimula ang karera, pinarangalan ang alaala ng namayapang si Queen Elizabeth II na reyna ng Gran Britanya mula nang idaos ang London Marathon noong 1981. Karaniwang ginaganap ang patakbo tuwing Abril subalit inilipat ito sa Oktubre simula 2020 bunga ng pandemya.

Ang susunod na yugto ng Abbott World Marathon Majors ay ang Bank of America Chicago Marathon sa Oktubre 9. Susundan ng TCS New York City Marathon sa Nob. 6 na ika-anim at huling yugto ng 2022.