Kaugnay ng conflict of interest... DOH official, inireklamo sa Ombudsman

ni Mylene Alfonso @News | September 24, 2026

Photo: File

Isang panibagong reklamo ang inihain sa Office of the Ombudsman laban sa isang mataas na opisyal ng Department of Health (DOH) na nakatalaga sa Health Facilities Enhancement Program Management Office (HFEP-MO), kaugnay ng umano’y conflict of interest, insider access at posibleng paglabag sa Anti-Graft and Corrupt Practices Act.

Target ng reklamo si Dr. Phoebe S. Tajanlangit, Director III na nakatalaga sa HFEP-MO.

Ayon sa mga complainant, may asawa si Tajanlangit na si “Joe” Tajanlangit na iniuugnay sa A.C. Tajanlangit Construction, Builders and Development Corporation, isang construction company.

Inirereklamo ang umano'y paulit-ulit na pagsama ng asawa ni Tajanlangit sa ilang official HFEP activities. Present umano ito sa mga site inspection, project evaluations, official travel at stakeholder meetings.

Hinihiling ng mga nagreklamo na siyasatin kung ang isang pribadong indibidwal na may kaugnayan sa construction industry ay nagkaroon ng access sa non-public procurement information, project evaluations, site assessments at iba pang impormasyong maaaring may kaugnayan sa bidding at project implementation. 

Kapag mapatunayan, hangad ng mga nagreklamo ang preventive suspension kay Tajanlangit. 

Kasama sa pormal na reklamo na magsagawa rin ng forensic lifestyle at SALN audit upang ikumpara ang Statement of Assets, Liabilities and Net Worth ni Tajanlangit sa mga kaugnay na corporate at financial records ng kanyang asawa at ng A.C. Tajanlangit Construction.

Kalakip umano ng reklamo ang DOH Department Personnel Order No. 2026-3821, na nilagdaan ni Health Secretary Teodoro J. Herbosa noong Mayo 14, 2026, na nagtalaga kay Tajanlangit bilang Director III sa ilalim ng HFEP.

Inihain noong Setyembre 2, 2026 ang reklamo ng grupong nagpapakilalang “Concerned DOH Employees/Crusaders Against Corruption and Government Graft.”