Kasama nina Zaldy Co at Eric Yap… SEN. CHIZ, MAY P100M BAHAY DAW SA BILLIONAIRE’S VILLAGE, ABML NAGSALITA NA

ni Janiz Navida @Showbiz Special | November 1, 2025

Photo: File / Sen. Chiz Escudero

Mainit talaga ang mata ng madlang pipol kay Sen. Chiz Escudero.

Makaraan ngang kuwestiyunin ang idineklara nito sa kanyang Statement of Assets, Liabilities and Net Worth (SALN) na P18.8 M lang ang kanyang net worth kaya siya ang maituturing na “poorest senator” pero na-afford daw nitong bumili ng Richard Mille wristwatch na worth P10.5 million, may bago na namang isyung ibinabato sa mister ni Heart Evangelista.

Ito’y matapos ngang ibalita ng Bilyonaryo News Channel na pare-parehong nagmamay-ari diumano sina Zaldy Co, Eric Yap at Sen. Chiz Escudero ng bahay-bakasyunan sa Alphaland Homes sa Itogon, Benguet na tinatawag na “Billionaire’s village”.

Ayon sa report ng BNC, 5-bedroom unit ang pag-aari ni Eric Yap (worth P80M), habang 6-bedroom unit naman (worth P100M) ang kay Sen. Chiz, at ito ay through a corporation, ang Charm of Baguio Log Homes Holding, Inc..

May kumalat din sa social media na galing sa post ng Alphaland Baguio Mountain Lodges kung saan makikita ang group photo nina Sen. Chiz at Heart kasama ang mga kapamilya at kaibigan na nag-double celebration umano sa naturang place para sa birthday ni Heart at wedding anniversary nila ng mister nu’ng Feb. 28, 2020.

Nandiyan din ang post naman ng Bistro Lokal FB page na pinasasalamatan sina Sen. Chiz at Heart sa suporta raw sa mga local artisans at businesses, kung saan sa photo ay makikita sina Heart at Chiz kasama ang isang lalaki na kuha pa rin daw sa Alphaland Baguio Mountain Lodges.

At dahil nga sa deklarasyon ni Sen. Chiz na P18.8M lang ang kanyang net worth at siya ang “poorest senator”, sinisilipan na naman siya kung paano raw nakabili ng bahay sa “Billionaire’s village” na worth P100M nga.

Agad namang nilinaw ng Alphaland Baguio Mountain Lodges (ABML) na walang pag-aari o bahay si Sen. Chiz sa loob ng kanilang high-end residential development sa Itogon, Benguet.

Sa isang pahayag na ipinadala sa pamamagitan ng text, sinabi ng pamunuan ng ABML na bagama’t hindi nila isinasapubliko ang listahan ng kanilang mga residente dahil sa privacy at security reasons, nakumpirma nilang walang bahay na nakarehistro sa pangalan ng senador o ng anumang kumpanyang konektado sa kanya.

“ABML, like any other residential village in the country, does not divulge a list of its residents or homeowners. However, we are able to confirm that there is no home listed as owned by Sen. Chiz Escudero or any company associated with him,” ayon sa pamunuan ng ABML.

Dagdag pa ng opisyal nito, madalas lamang bumisita si Escudero at ang kanyang pamilya sa nasabing property, bagay na makikita rin sa ilang social media posts ng iba’t ibang indibidwal, ngunit hindi ito nangangahulugang may pag-aari siya roon.

“We are aware that he and his family are occasional visitors to the property, as can be gleaned from numerous social media posts by various parties. Mrs. Escudero, being a long-time member of Alphaland Balesin Island Club, is allowed the privilege to use the facilities of ABML,” dagdag ng opisyal.

Ang Alphaland Baguio Mountain Lodges ay isang exclusive mountain residential project ng Alphaland Corporation, na kilala sa kanilang mga luxury lodges na may magagandang tanawin. Sister property ito ng Alphaland Balesin Island Club sa Quezon province.

Batay sa 2024 SALN ni Sen. Chiz, wala siyang idineklarang pag-aari o interes sa Alphaland o anumang real estate sa Baguio o Benguet.