Kapitana at anak, pinagbabaril ng mga naka-SUV

by Jeff Tumbado @News | November 18, 2026

Photo: File
Tatlong indibidwal kabilang ang isang barangay chairwoman at anak nito ang sugatan matapos tambangan ng mga hindi pa nakikilalang suspek sa Brgy. Tumbras, Kadayangan, Special Geographic Area (SGA) ng Bangsamoro Autonomous Region in Muslim Mindanao (BARMM), nitong Lunes ng hapon, Nobyembre 16.
Sa ulat ni PLt. Julito Gonzales, kinilala ang mga biktima na sina Chair Fatima Mokamad, ang kanyang 22-anyos na anak na lalaki at isang empleyado ng Ministry of Social Services and Development (MSSD).
Agad na isinugod sa ospital ang tatlong biktima upang lapatan ng lunas.
Ayon sa mga imbestigador, sakay ang mga biktima ng pickup at patungo sa national highway mula sa loob ng Brgy. Tumbras, nang mangyari ang insidente alas-2 ng hapon.
Pagdating sa sementadong bahagi ng barangay road, hinarang sila ng mga hindi pa nakikilalang armadong suspek na sakay ng isang puting SUV bago sila pinagbabaril.
Agad namang nagsagawa ng hot pursuit operation ang mga tauhan ng Kadayangan Municipal Police Station.
Patuloy pang inaalam ng mga awtoridad ang motibo sa likod ng pag-atake.
Ang Kadayangan sa SGA-BARMM ay binubuo ng mga barangay na nahiwalay mula sa Midsayap, Cotabato, matapos bumoto ang mga residente na maging bahagi ng Bangsamoro region.





Comments