K-12 graduate, tulungan para ‘di tambay

by Info @Editorial | July 15, 2024

Sa gitna ng isinasagawang pagtukoy sa mga naging problema sa K-12 program, inihayag na mas marami na umanong kumpanya ang bukas na mag-hire ng mga senior high school graduate.

Ito ay batay umano sa isang pag-aaral na isinagawa ng Philippine Business for Education (PBEd).

Sa ilalim ng 2024 Jobs Outlook Study ng PBEd, lumabas dito ang tumataas na posibilidad ng pag-hire ng mga kumpanya sa mga K-12 graduate kung saan apat mula sa limang firms ay handang mag-hire ng mga senior high school graduate.

Ang naturang pag-aaral ay sumaklaw sa 299 participants na kinabibilangan ng 14 na malalaking kumpanya habang 86% ay binubuo ng micro, small and medium enterprises (MSME).

Patunay umano ito sa potensyal ng K-12 program ng bansa, kung saan ay nagagawang makapag-produce ng employable graduates.

Masasabing malaking pagbabago na ito kumpara sa isang pag-aaral na isinagawa noong 2008 kung saan, isa mula sa limang firm lang ang ‘willing’ na mag-hire ng senior high graduates.

Samantala, lumalabas din sa naturang pag-aaral na 27% ng mga entry-level jobs sa bansa ay posibleng pupunan ng mga senior high graduate habang ang 73% ay pupunan pa rin ng college graduates.

Nangangahulugan ito na may paraan upang mapigilan na mauwi sa pagiging tambay ang mga estudyanteng pinangakuan ng trabaho pagka-graduate ng K-12.