Judo Nat'l squads, may 6 golds sa Malaysia

by Gerard Arce @Sports News | April 22, 2026

Photo: Ang Philippine national judo team sa pangunguna ni Southeast Asian Games medalists Daryl John Mercado at Joemari-Heart Rafael na nagwagi ng six gold medals sa katatapos na Penang Invitational Judo Championships sa Sunshine Central, Penang, Malaysia. (fbpix) 

Bumalibag ng kabuuang anim na gintong medalya ang Philippine national judo team team sa pangunguna nina Southeast Asian Games medalists Daryl John Mercado at Joemari-Heart Rafael sa katatapos lang na Penang Invitational Judo Championships nitong weekend na ginanap sa Sunshine Central, Penang, Malaysia.

Pinilipit ng two-time SEA Games medalist na si Mercado si Indonesian judoka Ahmad Andriyanto para tuluyang pasukuin sa pamamagitan ng armbar tungo sa matagumpay na panalo sa men’s under-60 kgs extra-lightweight division sa torneong nilahukan ng may 720 kalahok mula sa 10 bansa na kinabibilangan ng host country Malaysia, Australia, powerhouse Japan, Hong Kong, Uzbekistan, Singapore, Thailand, Indonesia, Vietnam at Pilipinas.   

“Maganda po, pero I think para sa ganu'ng weight category na under-60gs kulang pa. Need more strength at power para makasabay pa sa ibang country and more exposure pa siguro para sa amin sa national team,” pahayag ng tubong Muntinlupa City at bronze medalist sa nagdaang 33rd SEAG sa Thailand sa under-55 kgs o extra-extra lightweight category.

Sinundan ng matagumpay na silver medal finish sa 2025 Thailand Games ni dating collegiate judo Rookie/MVP na si Rafael ang pagpapalipad kay Xue Zhi Voon ng Malaysia sa women’s under-57kgs category, habang lumista rin ng gold si two-time biennial meet medalist Khrizzie Pabulayan sa women’s half-middleweight division.

Kasunod ng mahusay na performance sa Ju-No-Kata ng magkapatid na sina Jeanalane at Leah Jhane Lopez, kung saan nag-uwi ang pares ng ginto, sa kompetisyong sinimulan noong 2018 bilang grassroots tournament at paghahanda para sa 2027 hosting ng Malaysia sa biennial multi-sports event, magkahiwalay na titulo rin ang ibinulsa sa kani-kanilang kategorya.

Pinadapa ni Jeanalane si Germaine Foo ng Singapore sa women’s under-44kgs, habang dinaig ni Leah Jhane ang isa pang Singaporean na si Hyra Adena sa women’s under-48kgs.