Jeep swak sa kanal, 15 nadale

by Mai Ancheta @News | February 13, 2026

Photo: Pampasaherong jeep nahulog sa kanal sa Cuenca, Batangas matapos mawalan ng kontrol sa manibela ang driver nito. (Mai Ancheta)

Sugatan ang 15 pasahero ng isang passenger jeep makaraang mahulog ito sa kanal sa Brgy. Ibabao, Cuenca, Batangas nitong Miyerkules ng hapon.

Patungong Lemery ang jeep nang mag-lock umano ang manibela nito kaya nawalan ng kontrol ang driver at dire-diretsong nahulog sa kanal sa national highway.

Mabilis namang naisugod sa pagamutan ang 15 pasahero ng jeep matapos magtamo ng mga sugat dahil sa insidente.

Ang ibang sugatang pasahero ay inilipat sa ibang ospital para malapatan ng lunas.

Nasa kustodiya na ng Cuenca Municipal Police Office ang 32-anyos na driver ng jeep para sa kaukulang imbestigasyon.