Insentibo ng para athletes aabot ng P12-M ang ipamimigay

ni Gerard Arce - @Sports | August 12, 2022

Papalo sa halos P12-M ang nakatakdang ibigay na cash incentives ng pamahalaan mula sa Philippine Sports Commission (PSC) at Philippine Amusement and Gaming Corporation (PAGCOR) sa lahat ng medalist’s ng nagdaang 11th ASEAN Para Games (APG) na ginanap sa Solo, Indonesia.

Naging matagumpay ang kampanya ng 9 na pampalakasan mula sa archery, athletics, badminton, basketball, chess, judo, powerlifting, swimming, at table tennis na kumulekta ng kabuuang 104 medals mula sa 28 gold, 30 silver, at 46 bronzes, na maituturing na maganda ang puwesto sa ika-5th place finish overall ng 11 bansa na lumahok sa naturang paligsahan.

Maituturing ding pinakamahusay na pagganap ng atletang Filipino ang naturang palaro sapol noong 2009 Games sa Kuala Lumpur, Malaysia, kung saan nakakolekta ang bansa ng 24 gold, 24 silver, at 26 bronzes.

Sa ilalim ng Republic Act No. 10699 o ang Expanded National Athletes and Coaches Incentives and Benefits Act, ang mga makakuha ng gold, silver, at bronze medalists mula sa ASEAN Para Games ay may nakalaang cash incentives na nagkakahalaga ng P150,000, P75,000, at P30,000, ayon sa pagkakasunod. “Our para-athletes showcased their grit and hunger for success in the APG. The support of the Filipino people provided through the PSC are truly reciprocated,” pahayag ni PSC Officer-in-Charge at Executive Director Atty. Guillermo Iroy, Jr.

Tatanggap ng P500,000 si FIDE Master Sander Severino ng chess team, na naging most bemedalled Filipino athlete sa kompetisyon matapos magbulsa ng 4 gold at 2 silver medals mula sa individual at team categories. Tatanggap ang swimmers na sina Angel Otom at Ariel Joseph Alegarbes ng tig-P450,000 kada isa para sa tig-3 gintong medalya, habang si Paralympian Ernie Gawilan ay kukubra ng P382,500 para sa kanyang 2 gold, 1 silver at 1 bronze.