ni Bong Go @Bisyo Magserbisyo | Marso 2, 2024
Sa obserbasyon ng Fire Prevention Month ngayong Marso, muli po tayong nagpapaalala sa ating mga kababayan na maging maingat dahil mas mataas ang bilang ng insidente ng sunog ngayong tag-init.
Ginagawa ng ating pamahalaan ang lahat ng pagsisikap para matiyak na mayroon tayong matatag na mga mekanismo para mapigilan ang mga insidente ng sunog sa mga komunidad. Ang ating Bureau of Fire Protection ay sumasailalim sa modernization program alinsunod sa Republic Act No. 11589, o ang BFP Modernization Act, na tayo ang pangunahing may-akda at isa sa mga nag-co-sponsor.
Itinatakda ng RA 11589 na ang BFP ay sasailalim sa ten-year modernization program upang higit na mapalakas ang kakayahan nito sa pagtugon sa mga insidente ng sunog sa pamamagitan ng dagdag na mga tauhan, mga bagong kagamitan, specialized training para sa mga bumbero, at marami pang iba. Inaatasan din ang BFP na magsagawa ng monthly fire prevention awareness campaigns and information drives katuwang ang DILG at local government units para maturuan ang mga komunidad kung paano makaiiwas na masunugan. Nagpapasalamat tayo sa lahat ng kawani ng BFP sa kanilang mga sakripisyo upang proteksyunan ang bawat Pilipino.
Sa pag-iikot ko sa buong bansa, nakita ko talaga ang importansya ng pagpapalakas ng ating fire prevention campaigns. Kada buwan, ilang komunidad ang ating binibisita upang makapagbigay ng tulong sa abot ng aking makakaya. Saksi ako sa hinagpis na nararamdaman ng mga biktima ng sunog. Kapag may isang bahay na nasunog, damay ang mga kapitbahay. Kaya hiling ko sa ating mga kababayan na maging maingat at mapagmatyag sa mga posibleng pagmulan ng sunog gaya ng kandila, lutuan, hindi maayos na linya ng kuryente, depektibong kasangkapan, upos ng sigarilyo at iba pa.
Bukod sa fire prevention, patuloy ang ating dedikasyon na matulungan ang mga biktima ng sunog sa abot ng ating makakaya. Ngayong linggong ito ay nakapaghatid ng tulong at suporta ang aking Malasakit Team sa mga kababayan nating naging biktima ng magkakahiwalay na insidente ng sunog kabilang ang 73 residente ng Brgy. Niog, Bacoor City, Cavite; 54 sa Tumana, Marikina City; at 78 sa Brgy. 34-D, Poblacion District, Davao City.Natulungan din ang iba pang nasunugan noon kabilang ang 31 sa Brgy. Tejero, Cebu City; 52 sa Brgy. Vergara, Mandaluyong City; at 38 sa Dasmariñas City, Cavite na makabangon muli. Nakatanggap ang mga ito ng ayuda mula sa National Housing Authority sa ilalim ng programang ating isinulong noon para may pambili sila ng pako, yero, semento at iba pang materyales sa pagtatayong muli ng kanilang tahanan.
Bukod sa nasunugan, patuloy rin tayo sa pagtulong sa mga binagyo noon na sinisikap na makabangon muli tulad ng 2,377 sa Calayan Island sa Cagayan. Kahit napakalayo, sinadya naming mapuntahan sila ng aming tanggapan upang makatulong at mailapit ang serbisyo ng gobyerno sa kanila tulad ng housing assistance mula NHA.
Ako naman ay personal na pumunta sa Pasig City noong February 28 kasama si Senator Ronald dela Rosa sa paanyaya ni Senator Francis Tolentino para pangunahan ang pagkakaloob ng tulong para sa 600 mahihirap na residente ng lungsod. May hiwalay ding tulong ang ating tanggapan sa mga benepisyaryo.
Kinagabihan ay dumalo tayo bilang isa sa tagapagsalita sa ginanap na fellowship dinner ng League of Municipalities of the Philippines 2024 General Assembly sa Pasay City, sa paanyaya ni Mayor JB Bernos, ang LMP National President. Pinahalagahan ko ang aming iisang layunin bilang mga lingkod bayan na pagsilbihan ang komunidad at unahin ang kapakanan ng kanilang mga nasasakupan lalo na ang mahihirap.
Nasa Davao City naman tayo noong February 29 at nag-inspeksyon sa itinayong Multipurpose Hall kasama sina Brgy. Capt. Jerry Licarte, mga Brgy. Kagawad at ang mga City Councilors na sina Cheche Justol-Baguilod, Al Ryan Alejandre at Diosdado Mahipus, Jr. Sinaksihan din natin ang turnover ng isang unit ng multipurpose vehicle at isang unit ng mini dump truck. Matapos ito ay sinaksihan din natin ang turnover at pagbabasbas sa Multipurpose Hall sa San Jose Village. Ang mga naturang proyekto ay natulungan nating mapondohan bilang Vice Chair ng Senate Committee on Finance.
Guest speaker naman tayo at pinangunahan ang panunumpa ng mga opisyal ng Philippine Association of Water Districts, Inc. kasabay ng kanilang 45th National Convention na ginanap sa SMX Lanang, Davao City sa imbitasyon ni Convention Chair Ed Bangayan. Dito natin pinasalamatan ang grupo at pinahalagahan ang importansya ng sapat at malinis na supply ng tubig sa komunidad.
Masaya ko ring ibinabalita na sa araw na ito ay sinimulan nang itayo ang Besao (Mountain Province) Super Health Center na sinaksihan ng aking tanggapan kasama si Mayor Bryne Bacwaden. Nagkaroon na rin ng groundbreaking ang itatayong Besao District Hospital — na natulungan nating mapondohan sa ating kapasidad bilang Chair ng Senate Committee on Health at Vice Chair ng Senate Committee on Finance.
Natulungan natin ang 217 residente ng Kibawe, Bukidnon na nawalan ng hanapbuhay kasama si Mayor Jimboy Rabanes. Nabigyan din sila ng DOLE ng pansamantalang trabaho. Namahagi naman tayo ng mga damit sa mga mahihirap sa Paete, Laguna kasabay ng tulong mula sa national government kasama si Mayor Ronald Cosico.
Muli tayong nagpapaalala sa ating mga kababayan na maging maingat upang makaiwas sa anumang aksidente tulad ng sunog. Tandaan natin na ang gamit ay nabibili. Ang pera ay kikitain, subalit ang perang kikitain ay hindi nabibili ang buhay. A lost life is a lost life forever. Kaya pangalagaan natin ang buhay na ibinigay sa atin ng Panginoon.
Patuloy na magseserbisyo sa inyo ang inyong Mr. Malasakit sa abot ng aking makakaya dahil bisyo ko ang magserbisyo, at ako ay naniniwala na ang serbisyo sa tao ay serbisyo iyan sa Diyos.
Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.
Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.