Inaabangan ang tikas ng Attractive Force

ni Green Lantern - @Renda at Latigo | April 27, 2022

Maugong si Attractive Force sa social media kaya naman inaabangan ito ng mga karerista sa pista.

Nakatakdang sumalang ang pambatong kabayo ni Benjamin Abalos na si Attractive Force sa magaganap na 3-Year-Old & Above Maiden Race na ilalarga sa Metro Turf, Malvar - Tanauan City, Batangas ngayong araw.

Gagabayan ni EA Abrea, mapapalaban si Attractive Force kontra walong tigasing batang kabayo sa distansiyang 1,400 meter race. Ayon sa ibang karerista, posibleng maging mahigpit na karibal ni Attractive Force sa nasabing karera, na may added prize na P10,000, ay sina Basket Of Gold at magkakuwadrang Blue Empire at Costa Del Sol.

"Magaling na kabayo si Attractive Force, pero mahuhusay din ang mga kalaban kaya para sa akin ay anybody's race ito," saad ni Jestoni Sanchez, veteran karerista.

Ang ibang kalahok sa event na suportado ng Philippine Racing Commission, (PHILRACOM) sa pamumuno ni Chairman Reli De Leon ay sina I'll Have Another, Bagay Na Bagay, Express Lane, Swagger at Sentinel Node.

Posibleng abangan din ng mga karerista ang labanan ng anim na kabayo sa Condition Race (22) na pakakawalan sa unang karera. Markado si Lakan Takhan sa distansiyang 1,400 meter race, subalit naniniwala ang mga dehadista na malaki ang panalo nina Batang Heroes at Professor Jones na rerendahan nina Jessie Guce at Jonathan Hernandez, ayon sa pagkakasunod.

Maliban sa mga nabanggit na kabayo, ang ibang kasali ay sina Takdang Panahon at Premiere Danseur.

Samantala, pitong races ang ilalarga ngayong araw kaya inaasahang masaya ang pananaya ng mga karerista.

Mga Pili ni Green Lantern:

Race 1. Lakhan Takhan (6), Professor Jones (4)

Race 2. Attractive Force (1), Basket Of Gold (4), Express Lane/Swagger (5/5A)

Race 3. Double Rock (4), Kid Kenshin (3)

Race 4. Dollarama (3), Tsetseburetse (7), Thriller (4)

Race 5. Jawo/Bishop Blue (1/1A), Janni Banni (7)

Race 6. Extremely Tough (6), Bigmouthbernie (5)

Race 7. Easy Landing/Battle Scar (6/6A), Don Lucas (3), Noh Sen Young Yana (7)